Dövlət qəzetindən cavab gecikmədi: "Məqalədən Mikayıl Cabbarovun xəbəri olub"
"Respublika" qəzetinin rəhbərliyi həmin məqalədən nazir Mikayıl Cabbarovun xəbəri olduğunu bildirib.
Ölkə.Az xəbər verir ki, 27 oktyabr 2017-ci il tarixində "Respublika” qəzetində "Müstəqillik illərində Azərbaycanda təhsilin inkişafı” adlı yazı dərc edilib və müəllif olaraq təhsil naziri Mikayıl Cabbarov göstərilib.
Təhsil Nazirliyinin mətbuat xidməti isə məlumat yayaraq qeyd olunan yazının nazir tərəfindən yazılmadığını və həmin yazının hazırlanması ilə bağlı "Respublika” qəzetindən Təhsil Nazirliyinə heç bir müraciət daxil olmadığını bildirib.
Skandal yazı ilə bağlı Ölkə.Az "Respublika” qəzetinin baş redaktoru Teymur Əhmədovun mövqeyini öyrənib.
"Həmin məqalədən şəxsən nazir Mikayıl Cabbarov xəbərdar olub. İndi bu məlumatı nə üçün yayıblar bilmirəm, ancaq yazı bizə nazirlikdən göndərilib. Məsələni araşdırıram", - deyə baş redaktor saytımıza verdiyi açıqlamasında bildirib.
Xatırladaq ki, bu gün dərc olunan məqalə kifayət qədər geniş olub və qəzetin iki səhifəsində dərc olunub.
