Dünyanın ən bahalı futbolçuları
Futbol dünyanın ən maraqlı oyunlarından biridir. Bu səbəbdən oyunlar zamanı bir çox evdə televizorlar futbolu canlı yayımlayan kanala çevrilir. Təbii ki, bəzən bu məsələyə görə evin qadın və kişi təbəqəsi arasında fikir ayrılığı da yaranır. Amma bugünkü mövzumuz bu anlaşılmazlıq yox, ən çox pula top qovan oğlanların gəliri və siyahısıdır.
Ölkə.Az 2016-cı ilin ən bahalı futbolçularının siyahısını təqdim edir.
10. Sesk Fabreqas
"Çelsi" klubunun yarımmüdafiəçisi Fabreqas London klubundan ildə 16 milyon avro maaş alır. 29 yaşlı futbolçu il ərzində reklamdan 5 milyon avro gəlir əldə edir.
9. Eden Azar
"Çelsi" klubunun digər futbolçusu Eden Azarın klubdan illik gəliri 22 milyon avrodur. Bu pulun 18 milyonu müqaviləyə görə maaş qismində alınır. 4 milyon avro isə bonus qismində əldə edilir. Bu bonus klubun sponsorlarının reklamlarından əldə edilir.
8. Luis Suares
"Barselona" futbol klubunun və Uruqvay milli yığmasının hücumçusu Suaresin illik gəliri 23 milyon avrodur. Bu pulun 18 milyonu maaş, 5 milyonu isə reklam gəlirləridir.
7. Serxio Aquero
"Mançester Siti" klubunun hücumçusu Serxio Aqueronun illik gəliri 24 milyon avrodur.
6. Ueyn Runi
"Mançester Yunayted" klubunun futbolçusu Ueyn Runinin gəliri 26 milyon avrodur. Onun maaşı 20 milyon, reklam gəlirləri isə 6 milyon avrodur.
5. Qaret Beyl
Uels yığmasının oyunçusu Beyl ölkənin ən imkanlı futbolçusudur. Onun illik gəliri 34 milyondur. "Real Madrid" klubundan aldığı maaş 24 milyon avro olan Qaretin reklam gəliri 10 milyon avrodur.
4. Neymar
"Barselona"lı Neymar şəxsi maraqlarını komanda maraqlarından üstün tutduğu üçün daim tənqid edilir. Amma illik 36 milyon avro gəlir əldə edən braziliyalının bu tənqidlər vecinə də deyil. İllik maaşı 14 milyon olan Neymar reklamdan il ərzində 22 milyon avro qazanır.
3. Zlatan İbrahimoviç
İsveç yığmasının və "PSJ" klubunun hücumçusu Zlatan dünyanın ən bahalı futbolçuları siyahısında üçüncüdür. Paris klubundan ildə 30 milyon avro maaş alan İbrahimoviçin illik reklam gəliri 7 milyon avrodur.
2. Lionel Messi
Bir çox futbol azarkeşi və mütəxəssisinin fikrinə görə, Messi dünya tarixinin ən yaxşı oyunçusudur. "Barselona" və Argentina yığmasının hücumçusunun illik gəliri 77 milyon avrodur. Klubdan illik 51 milyon avro maaş alan Messinin illik reklam gəliri 26 milyon avrodur.
1. Kriştianu Ronaldu
"Real Madrid" futbol komandasının oyunçusu Kriştianu Ronaldunun illik gəliri 82 milyon avrodur. Onun "Real"dan aldığı illik maaş 53 milyon avrodur. 31 yaşlı hücumçunun illik reklam gəliri 29 milyon avrodur.
Hikmət
Ölkə.Az
