Politoloq: "Ukrayna bir daha Avrointeqrasiya yolu tutduğunu elan etdi"

Xəbər verdiyimiz kimi dünən Ukrayna Ali Radasında seçkilər günü idi. 36,5 milyon seçicinin qeydiyyatdan keçdiyi seçki günündən sonra bütün nəticələr ictimaiyyətin nəzərinə çatdırıldı. Səsvermənin ardınca Ali Radada demək olar ki, Rusiyapərəst qüvvələr qalmadı.

Bəs görəsən, bu gündən sonra Rusiya Ukrayna münasibətləri nə cür davam edəcək?

Ölkə.az-ın sualını politoloq Vəfa Quluzadə cavablandırıb. Onun fikrincə, Ukraynanın yolu Avrointeqrasiya yolu olacaq.

"Rusiya prezident seçkilərini tanıyaraq Poroşenkonu prezident kimi tanıdı. Poroşenko ilə Putin ara-sıra görüşür, telefon bağlantısı qururlar. Deməli, Rada artıq Rusiya tərəfindən tanınıb. Ona görə də, Ukrayna tutduğu yol ilə davam edəcək. Bu gündən Ukraynanın yolu Avrointeqrasiya yoludur".

Xatırladırıq ki, Ali radaya keçirilən seçkilərdə Proşenkonun özünün rəhbərlik etdiyi siyasi blok səslərin 21,65% qazanaraq ikinci yeri tutub. Birinci yeri isə baş nazir Arseniy Yaçenyukun rəhbərlik etdiyi "Xalq cəbhəsi" partiyası tutub.

Xatırladaq ki, Ukrayna Ali Radasında 450 deputat yeri var.

Fatimə İbrahimova
Ölkə.az