\"Türkiyə və Azərbaycan xüsusi xidmət orqanları arasında sıx əlaqə var\"

DTX terrorulara qarşı əməliyyat həyata keçirib.

Belə ki, DTX əməkdaşları terrorçuluq fəaliyyətində şübhəli bilinən 21 yaşlı A.Quliyevin Bakı-Ələt yolunda hərəkətdə olan Bakı-İstanbul avtobusunda olmasını müəyyənləşdirib. Əməliyyatçılar A.Quliyevi avtobusdan endirmək istəyərkən o, üzərində olan əl qumbarasını partlatmaq istəyərək müqavimət göstərməyə çalışıb. Əməliyyat nəticəsində iki terrorçu öldürülüb, biri isə tutulub.

Azərbaycanda keçirilən anti-terror əməliyyatı ilə yanaşı Türkiyədə də əməliyyatlar həyata keçirilib. Türkiyədə bir neçə terrorçu zərərsizləşdirilib.

DTX-nın həyata keçirdiyi anti-terror əməliyyatını MTN-nin keçmiş polkovniki İlham İsmayıl Ölkə.Az-a şərh edib:

"Keçmiş təcrübəmdən deyə bilərəm ki, müstəqillik əldə edəndən sonra Türkiyə xüsusi xidmət orqanları ilə Azərbaycan xüsusi xidmət oranları arasında xüsusi münasibət var. Hər iki ölkənin xüsusi xidmət orqanları arasında informasiya mübadiləsi edilir. Bu informasiya mübadiləsi imkan verir ki, qabaqlayıcı addımlar atmaq mümkün olsun. Türkiyədə 15 iyul hakimiyyət çevrilişinə cəhddən sonra, bizdə isə Mili Təhlükəsizlik Nazirliyinin ləğv edilib yeni qurumların yaradılmasından sonra iki ölkənin xüsusi xidmət orqanları arasında daha isti əlaqələr yaranıb. Paralel şəkildə informasiyaların getməsi, paralel şəkildə əməliyyatların keçirilməsi müsbət qarşılanmalıdır. Əsas odur ki, təhlükə aradan qalxır.

Azərbaycanın terrorçulara qarşı həyata keçirdiyi əməliyyatı müsbət dəyərləndirirəm. Sadəcə əməliyyatın keyfiyyətində problem var. Düzdür, bilmirəm əməliyyat hansı şəraitdə həyata keçirilib. Əməliyat zamanı 2 nəfər ölüb. Halbuki o iki nəfər sağ qalsa idi daha çox informasiyalar əldə etmək mümkün olardı, başqa şəxslərə, rabitələrə çıxmaq olardı. Hər halda xüsusi xidmət orqanlarımız terrorçu zərərsəzləşdirib, ölümlərin olması da normal haldır".

Səxavət Məmməd
Ölkə.Az