Azərbaycanlı millət vəkilindən ABŞ-da seçkiləri müşahidə etmək üçün

“ABŞ-da dünyanın ən qeyri-demokratik prezident seçkiləri keçirilir”.

Bu fikirləri Ölkə.Az-a açıqlamasında Milli Məclisinin deputatı, Qarabağ müharibəsi veteranı Elman Məmmədov bildirib.

ABŞ-da noyabrın 8-də keçiriləcək seçkiləri dəyərləndirən E.Məmmədov qeyd edib ki, Birləşmiş Ştatlarda seçki öncəsi vəziyyət böyük rüsvayçılıqdır:

“Amerikada hər zaman anti-demokratik şərait olub. Sadəcə olaraq, indi yaxınlaşan seçkilərlə bağlı ABŞ vətəndaşları seçki saxtakarlığını özləri açıq şəkildə bəyan edirlər. Yaxşı olar ki, Amerikalılar Barak Obamanın seçkilərinə nəzər salsınlar. Barak Obamanın seçki prosesi zamanı ABŞ-da xeyli sayda seçki pozuntuları baş verib. Uzun illərdir ki, ABŞ Konstitusiyasında islahatlar aparılmır. Ona görə də bu ölkənin Seçki Məcəlləsində ciddi qüsurlar mövcuddur.

Azərbaycanda seçkilər keçiriləndə biz hesab edirik ki, seçki hüququ olan hər bir vətəndaş məntəqələrə gəlib səs verməlidir. Azərbaycanda bu tələb bütün seçkilərə şamil olunur. Ancaq bütün dünyaya demokratiya və insan hüquqlarından dərs keçməyə çalışan, bir çox dövlətlərdə, həmçinin, Azərbaycanda keçirilən seçkiləri “qeyri-şəffaf” adlandıran ABŞ-da seçki hüququ olan vətəndaşların cəmi 20-25 faizi seçkilərdə iştirak edir. Bütün bunlar demokratiyadırmı? Budurmu insan hüquqları? Məgər bu insanın seçib-seçilmək hüququnun, demokratiyanın, azad seçkilərin pozulması deyilmi? Düşünürəm ki, ABŞ-ın buna izah verməyə şərhi yoxdur”.

E.Məmmədov deyib ki, əgər ABŞ demokratiyadan, insan hüquqlarından, seçkilərin şəffaflığından danışırsa, ilk növbədə öz seçki sisteminə nəzər salmalıdır:

“ABŞ birinci növbədə öz qanunlarında mövcud olan çox ciddi qüsurları aradan qaldırmalıdır. Yalnız bundan sonra ABŞ-ın digər ölkələri tənqid etməyə mənəvi haqqı ola bilər. Bununla bağlı atalarımızın da çox gözəl deyimi var: öz gözündə tiri görmür, başqasının gözündə tük axtarır. ABŞ-ın hərəkətləri ancaq bunu ifadə edir.

Vaxt var idi ki, ABŞ-ın ayrı-ayrı dairələri və nümayəndələri Azərbaycana qarşı ittihamlar səsləndirirdi, seçkilərlə bağlı bizə irad tuturdular. Bu iradlar ABŞ-ın Dövlət Departamenti səviyyəsində olub. Azərabaycanda keçirilən seçkilərlə bağlı ən çox iradları bu olurdu ki, guya hakimiyyət öz istədiyi namizədlərə dəstək verir və sairə. Ancaq indi ABŞ-da seçki öncəsi vəziyyətə baxın. İndi Barak Obama ABŞ prezidentidir və onun səlahiyyətləri hələ bitməyib. Ancaq Barak Obama prezident ola-ola seçkilərdə iştirak edən bir namizədi açıq və ciddi şəkildə dəstəkləyir, onun seçki kampaniyasında yaxından iştirak edir, digər namizədi isə aşağılayıb təhqir edir. Hətta, mən düşünürəm ki, Donald Tramp təhqir olunduğuna görə Barak Obamanı məhkəməyə verməlidir. Çünki Barak Obama Donald Trampın şəxsiyyətini təhqir edib, digər tərəfdən isə Seçki Məcəlləsinin tələblərini pozub. Bütün bunlar hansı insan hüquqlarının qorunmasına və demokratik şəraitə sığır? Mənə elə gəlir ki, ABŞ bütün bu qədər nöqsanları ilə dünyaya ağalıq etmək cəhdlərinə də son verməlidir”.

Deputat ABŞ-da keçiriləcək prezident seçkilərində müşahidə aparmaq istədiyini də bəyan edib:

“Mən çox istərdim ki, Azərbaycandan olan millət vəkili kimi gedib ABŞ-da seçkiləri müşahidə edim. Ancaq əminəm ki, mənim ABŞ-da seçkiləri müşahidə etməyimə qəti imkan verməzlər. Bəzən kimsə deyir ki, mən gedib ABŞ-da seçkiləri müşahidə aparmaq istəyirəm. Həmin adama deyirlər ki, sizi həmin ştata buraxmazlar. Ancaq müxtəlif vaxtlarda keçirilən seçkiləri izləmək üçün ABŞ-dan Azərbaycana gələn müşahidəçilər olub. Bundan əlavə, ABŞ-ın Azərbaycandakı səfirliyinin əməkdaşları da ölkəmizdə keçirilən seçkilərdə müşahidə aparıblar. Yəni, ABŞ və digər ölkələrdən olan nümayəndələr Azərbaycanın bütün seçki məntəqələrinə gedib sərbəst şəkildə müşahidə aparıblar. Təkcə bu fakt göstərir ki, Azərbaycanda seçkilər bu cür şəffaf və açıq, ABŞ-da isə bunun tam əksi olaraq təşkil olunur. İndi kimin kimə seçki və demokratiya dərsi verməyə mənəvi haqqı çatır? Əlbəttə ki, Azərbaycanın!

Ümumiyyətlə, ABŞ-a heç kəs səlahiyyət verməyib ki, başqa ölkələrin daxili işlərinə qarışsın, dünyaya ağalıq etsin və sairə. Sadəcə olaraq ABŞ özü özünü “dünya jandarması” elan edib. Amerika elə düşünür ki, guya dünyanı o idarə etməlidir. Ancaq ABŞ-a məsləhət görürəm ki, gedib öz daxilindəki vəziyyətə, son bir ildə dünyada hüququ tapdalanan, Yaxın Şərqdə bombalanan, ölən, yaralanan günahsız insanlara, irqinə və dininə görə küçədə güllələnən insanlara baxsın. Bu gün ABŞ dünyanı qana boyayıb, “şeytan yuvası”na çevirib”.

Qarabağdan olan deputat söyləyib ki, dünyada nə qədər terror təşkilatları varsa, hamısını ABŞ yaradıb:

“İŞİD, “Əl qaidə”, “Taliban”, PKK, erməni terror təşkilatları da ABŞ tərəfindən maliyyələşdirilir, müdafiə olunur. Dünyanın ən qatı terrorçuları ABŞ dövləti tərəfindən hazırlanaraq, dünyanın ayrı-ayrı ölkələrinə göndərilib. ABŞ-ın “demokratiya”, “insan haqqları” dediyi də məhz budur”.

Zaur Əziz
Ölkə.Az