Aqil Abbas: “İdmançılarımızda dopinqin aşkarlanması siyasi məqsədlər daşıyır”

“İdmançılarımızda dopinqin aşkar olunması ilə bağlı məsələdə də siyasi məqsədlər mövcuddur. Ölkəmizi bir-iki nəfərə görə bu cür cəzalandırmaq istəyirlər”.

Ölkə.Az-ın məlumatına görə, bu fikirləri millət vəkili Aqil Abbas parlamentin bu gün keçirilən plenar iclasında “İdmanda dopinq vasitələrindən və üsullarından istifadəyə qarşı mübarizə haqqında” yeni qanun layihəsinin müzakirəsinə münasibət bildirərkən deyib.

A.Abbas bildirib ki, Azərbaycanın hər hansı bir idmançısında 8 ildən sonra dopinq aşkarlanıb:

“Məlum olur ki, bunun analizləri hələ qalıb. Sən demə dopinq qəbul edirmiş. Bu nə deməkdir? Heç 8 ildə ölü qalmır, çürüyüb gedir. Ona görə də düşünürəm ki, bu dopinq məsələsində həm də siyasi məqsədlər var. Ölkəmizi bir və ya iki nəfərə görə cəzalandırmaq istəyirlər”.

Qeyd edək ki, sözügedən qanun layihəsi ilk oxunuşda konseptual olaraq qəbul edilib.

Zaur Əziz
Ölkə.Az