Azərbaycanda vertolyotlar hərraca çıxarıldı

Vertolyotlardan ikisi 1993-cü il istehsalıdır.

Azərbaycanın Daşınmaz Əmlak Məsələləri üzrə Dövlət Komitəsi bu gün keçiriləcək hərracda üç hava nəqliyyatı olan vertolyotu satışa çıxarıb.

Ölkə.Az Komitənin saytına istinadən xəbər verir ki, hərraca çıxarılan vertolyotlar Mİ-8 MTV1 markalı olub, 1993 və 1991-ci ildə istehsal ediliblər.

Vertolyotlardan ikisi 1993-cü il istehsalıdır və onların qiyməti 134 min 271 və 134 min 323 manat təşkil edir. Həmin vertolyotları almaq üçün müvafiq olaraq 13 min 427 və 13 min 432 manat beh ödəmək lazımdır.

Üçüncü vertolyot 1991-ci il buraxılışdır və onun satış qiyməti 130 min 23 manat təşkil edir. Vertolyotu almaq üçün 13 min 2 manat beh ödəmək lazımdır.  

Hərraclar Azərbaycan Respublikası Əmlak Məsələləri üzrə Dövlət Komitəsi yanında  Hərracların Təşkili üzrə Auksion Mərkəzində keçiriləcək.

Qeyd edək ki, Mi-8MTV-1 markalı vertolyot 1988-ci ildə Kazanda seriya istehsalına buraxılıb və TVZ-117VM, TVZ-117VM 2-ci seriya, VK-2500-03 mühərrikləri ilə təchiz olunur. 

Ölkə.Az