Analarının başı kəsilən uşaqlar övladlığa verilə bilər

Zərdabda ailə-məişət zorakılığı zəminində baş verən qətil hadisəsinin şahidi olan 3 azyaşlı uşaq Gəncə SOS Uşaq kəndinə veriləcək.

Ölkə.Az xəbər verir ki, bu barədə AzVision.az-a daxil olan məlumatda qeyd edilib ki, uşaqlar bu gün Gəncə SOS-a yerləşdiriləcək. 

Ailə, Qadın və Uşaq Problemləri üzrə Dövlət Komitəsinin Hüquq şöbəsinin müdiri Taliyə İbrahimova məlumatı təsdiqləyib. 

O qeyd edib ki, hazırda uşaqların sənədləşdirmə işləri gedir. “SOS ailə tipli müəssisə olduğu üçün qərara alınıb ki, həmin uşaqlar ora yerləşdirilsin. Biz stəmrik ki, onları internat evlərinə verək, çünki orada yaşlara görə qruplaşdırma aparıldığı üçün uşaqlar bir-birilərindən aralı düşəcəklər. Onları ayırmaq istəmirik. Uşaqlar yerli icra orqanı və dövlət komitəsinin nəzarətində olacaqlar”. 

T.İbrahimova həmin uşaqların övladlığa verilməsinin mümkünlüyünü qeyd edib. “Həmin uşaqlar komitədə qeydiyyata alındıqdan sonra 6 ay müəddətində vətəndaşlarımızın övladlığa götürməsi üçün təqdim olunur. Əgər 6 ay müddətində vətəndaşlarımız uşaqları övladlığa götürməzlərsə, o zaman əcnəbilərə övladlığa verilə bilər”. 

Qeyd edək ki, bir neçə gün öncə Zərdab rayonunun Yarməmmədbağı kəndində qətil hadisəsi baş verib. Kənd sakini, 1983-cü il təvəllüdlü Aslanov Aqşin Usub oğlu yaşadığı evdə həyat yoldaşı, 1993-cü il təvəllüdlü Aslanova Rüxsanə Rüstəm qızının bıçaqla boğazını kəsərək öldürüb. Hadisə az yaşlı uşaqların gözü qarşısında baş verib. Hadisə qısqanclıq zəminində baş verib. Hadisəni törədən A.Aslanov saxlanılıb. Faktla bağlı Zərdab rayon Prokurorluğunda Cinayət Məcəlləsinin 120-ci (qəsdən adam öldürmə) maddəsilə cinayət işi başlanıb. 

Ölkə.Az