Aftandil İsrafilov davamçısının adını açıqladı
Onun heç bir təqdimata ehtiyacı yoxdur. Azsaylı sənətkarlardandır ki, ifa etdiyi musiqi aləti məhz onun adıyla bağlıdır və onun barmaqlarının sayəsində sevilib. Son zamanlar efirlərdə də az-az görünür. Deyir ki, sənətkar hər gün artırmalıdır.
Ardını xalq artisti Aftandil İsrafilov özü Ölkə.Az-a danışır...
- Aftandil müəllim, necəsiniz, səhhətiniz, əhvalınız necədir?
- Neçə gündür öskürürəm. Bir mən deyiləm, çox adam bu ərəfədə naxoşdur. Elə şeyləri evdə müalicəylə ötüşdürürük. Maşallah, ifaçılıq qabiliyyətim yerindədir. Bilmirəm, baxmısınız, ya yox. İki gün əvvəl İTV-də çıxış elədim.
- Sizi sonuncu dəfə AZTV-nin efirində görmüşdüm. Bir neçə məşhur musiqiçilər qonaq idi...
- Bəli, doğrudur.
- Demək istədiyim odur ki, elə bil son zamanlar efirə nadir hallarda çıxırsınız. Dəvətlər az olur, yoxsa başqa səbəb var?
- Bəzən dəvətlər üst-üstə düşür. Məsələn, həm AZTV-dən çağırırlar, həm başqa telekanaldan.
- Yəqin ki, seçim olanda AZTV-yə üstünlük verirsiniz.
- Sözsüz ki, AZTV-yə gecikməməyə çalışırıq. Elə məktəb illərindən AZTV-yə getmişəm. Digər telekanallar da sağ olsun, dəvət edirlər. İmkanım olanda gedirəm.
- Bilirəm ki, pedaqoji fəaliyyətiniz olmasa da, yüzlərlə qarmon ifaçıları məhz sizdən bəhrələniblər.
- Bəli, doğru dedin, bəhrələniblər.
- Fikir verirəm ki, son zamanlar gənc və istedadlı qarmon ifaçısı Orxan Mirzəyevlə yaradıcı dostluğunuz daha da möhkəmlənir, daha çox ünsiyyətdə olursunuz...
- Orxan gözəl sənətkardır. Sənət belədir ki, gündən-günə üstünə gəlməlidir, üstündən götürmək olmaz. Orxanın üstünlüyü ondan ibarətdir ki, öyrənməyə meyillidir, çalışqandır. Zəng vurur ki, Aftandil müəllim, olar görüşək? Canla-başla deyirəm ki, gəl bizə. Gəlir, otururuq, söhbət edirik, fikirlərimizi paylaşırıq. Onun götürmə qabiliyyəti, istedadı, eşitməsi həddindən artıq gözəldir. Ona görə də Orxanla incəsənət dostluğumuz davam edir.
- Orxanı sizin tələbəniz, davamçınız hesab etmək olar?
- Davamçım demək olar, tələbə demək bir az düz gəlmir. Bəziləri kiməsə bir-iki şey göstərib deyirlər ki, mənim tələbəmdir. Belə olmaz. Orxan ailəcanlı, vətənini sevən, dövlətinə qulluq edə bilən sənətkardır.
- Qarmon deyiləndə ilk ağıla gələn sizin adınızdır. Başqa sahəni seçmiş olsaydınız, bu gün sizin olduğunuz yerdə kim dayana bilərdi?
- Çox ağıllı sualdır. Amma bir şey deyim. Azərbaycanda yaxşı sənətkarlar var. Birinin adını çəksəm, gərək hamısının adını çəkim. Ona da yarım saat vaxt lazımdır.
- Xanlar Cəfərov...
- Xanlar dostumuzdur, gözəl sənətkardır. Hərdən bəzi suallarını verir, mən də cavablandırıram. Elə olur ki, o soruşmadan sözümü deyirəm ki, sən ansamblda rəhbərsən, məşq edirsiniz. Çalış ifaçılara düzgün ifa etməklə yanaşı, arada özün də solo ifa elə.
- Yəni, tövsiyyə verirsiniz...
- Dostdur, ağıllı oğulların biridir, məsləhətə qulaq asandır.
- Özünüz hansı musiqiçilərə qulaq asırsınız?
- Qulaq asmaq məsələsi bir az başqa cürdür. Çoxdandır qulaq asmıram. Mənə başqa sənətkarları dinləmək olmaz. Özüm vaxtilə eşitmişəm, kimin qabında nə varsa, hamısını bilirəm. Onlar deməsələr də, məni dinləyirlər, amma mən kimisə dinləmirəm.
- Belə anladım ki, başqalarını dinləsəniz, sənətinizdə geriləmə ola bilər.
- Bəli, bəli.
- Yəni özündən daha güclüsünü dinləməlisən.
- Güclü olan musiqinin özüdür. Əgər yaxşı, güclü musiqi varsa, bəs edir. Məni harasa çağıranda deyirlər ki, mümkünsə oynaq rəqslər ifa et. Axı lirik melodiyalar da var. Tofiq Quliyev, Üzeyir Hacıbəyli, Cahangir Cahangirov... Cahangir Cahangirovun bir "Durnalar" mahnısı var. Çox çətin mahnıdır, ifa etmişəm. Neçə vaxtdır efirdə onu ifa etmək istəyirəm, deyirlər ki, bir oynaq şey ifa et, "Durnalar" yaddan çıxır. Səid Rüstəmovun, Ələkbər Tağıyevin lirik melodiyaları var. Hərdən "Külək" mahnısını ifa edirəm. O ifanı dinləyin. Məclislərdə onu ürəyim istədiyim səpkidə ifa etmirdilər. Bu elə bir mahnıdır ki, onu iti ritmdə çalmaq olmaz. Bu, adından bəllidir. İti ifa etsən, elə bil ki, üstünə qışqırırsan. Orada bir həzinlik var axı.
- Son olaraq, istərdim ki, gənc ifaçılara tövsiyyənizi bilək.
- Musiqi elə sahədir ki, öyrəndikcə öyrənirsən. Hər gün nəsə öyrənməlisən ki, sənətkar ola biləsən. Daim öz üzərlərində çalışsınlar. Əgər bir gün dayansalar, çətin olacaq.
İntiqam VALEHOĞLU
Ölkə.Az
