Zahid Oruc: "Onda bizim Ali Sovetdən nə fərqimiz var?"
Zahid Oruc: "Əgər biz bu məsələlərdən bəhs ediriksə, vətəndaşın xeyrinə olan mövqe ortaya qoyuruqsa, bunu heç bir halda emosiya ilə və sərt qarşılamaq olmaz"
Bu gün parlamentdə gedən müzakirələr zamanı spikerlə millət vəkili Zahid Oruc arasında müəyyən anlaşılmazlıq baş verib.
Belə ki, müzakirə zamanı çıxış edən deputat Zahid Oruc vətəndaşları narahat edən bir sıra problemlərdən bəhs edib. Çıxışdan narazı olan spiker Oqtay Əsədov Zahid Orucun sözünü kəsərək “Zahid Oruc, mən heç kimin xətrinə dəymək istəmirəm. Amma tamam başqa məsələ müzakirə olunurdu. Biz burda Ali Məhkəmə deyilik”, deyə cavab verib.
Məsələ ilə əlaqədar millət vəkili Zahid Orucun münasibətini öyrəndik. Ölkə.az-a danışan millət vəkili bildirdi ki, baş verən anlaşılmazlığı özünə qarşı şəxsi qərəz kimi dəyərləndirmir.
"Ümumiyyətlə parlament iclasları təbii ki, müxtəlif fikirlərin təqdim olunması şəraitində keçirsə, belə reaksiyalar, söz toqquşmaları çox təbiidir. Bunu da iclas salonundan kənara çıxartmamaq gərəkdir. Söhbət odur ki, mən konkret olaraq inzibati icraat haqqında qanun layihəsinə edilən dəyişiklilər ətrafında fikirlərimi bölüşürdüm və spikerden belə reaksiya verildi ki, bunlar məhkəmə haqqında qanunvericilik zamanı irəli sürülsə, daha optimal olardı, halbuki dediyimiz məsələ də bu predmet üzrədir. Daha dərin yanaşılsa, icra məmuru, inzibati xarakterli qərarların yerinə yetirilməsi, onlara baxılması mənim danışdığım məsələləri özündə etiva edirdi. Məsələn hər hansı bir vətəndaş dövlət qurumundan bir xidmət alırsa, hər hansı bir hökümət strukturu ilə münasibətlərini nə cür tənzimləməlidir? Tutaq ki, o, su, elektrik enerjisi ilə əlaqəli münasibətlərini müqavilə ilə ortaya qoya bilmir. Sonra isə onun mülkiyyətinə, əmlakına zərbə dəyirsə, həmin problem hansı məhkəmədə çözülməlidir?
Əgər biz bu məsələlərdən bəhs ediriksə, vətəndaşın xeyrinə olan mövqe ortaya qoyuruqsa, bunu heç bir halda emosiya ilə və sərt qarşılamaq olmaz.
Mənim də yerdən söylədiyim fikirlər ondan ibarət idi ki, parlament üzvü azaddır, sərbəst şəkildə öz mövqeyini ortalığa qoya bilər. İclasda çıxış edən hər kəs də buranın ideyalar məkanı, siyasi müzakirələr meydanı olmağına xidmət edir. Yox, əgər fərqli düşüncələr varsa, kimsə hesab edirsə ki, milli məclis sadəcə ayrı-ayrı sənədlərə formal, texniki, mexaniki münasibət bəsləyirsə, onda bizim Ali Sovetdən nə fərqimiz var?
Bunu özümə qarşı şəxsi qərəz kimi dəyərləndirməsəm də, parlament içində diskussiyalara meydan verilməsi mövqeyini hər zaman ifadə edirik. Millət vəkilinin mövqeyini sıxışdırmaq, ona qarşı hər hansı bir kəskin münasibət bildirmək, düşünmürəm ki, mühakimə olunacaq bir məsələdir. Bu dünyanın istənilən ölkələrində baş verir. Daha bundan da irəli emosiyaların, qaynar toqquşmaların, hətta bəzən fiziki əlbəyaxa toqquşmaların şahidi oluruq. Ona görə də, qəti şəkildə bu mövzuda hər hansı bir narahatçılığım yoxdur. Bundan sonrakı dövrdə də sərbəst, düşündüyümüz mövqeləri, milli maraqlara uyğun məsələri tribunaya gətirməyə davam edəcəyik".
Qeyd edək ki, bənzər hadisə ötən iclaslardan birində Zahid Oruc və Ziyafət Əsgərov arasında baş vermişdi.
Fatimə İbrahimova
Ölkə.az
