Türkiyəli general: “HDP-də təmsil olunanların bir çoxu ermənidir”

“Xalqların Demokratik Partiyası (HDP) PKK terror təşkilatının Türkiyə Böyük Millət Məclisində yerləşən siyasi qanadıdır”.

Bu fikirləri Ölkə.Az-a eksklüziv açıqlamasında Türkiyə Hava Təşkilatı Universitetinin rektoru, Türkiyə Hərbi Hava Qüvvələrinin ehtiyatda olan general-mayoru, sabiq millət vəkili Kürşat Atılgan bildirib.

Türk general deyib ki, HDP üzvləri 2007-ci ildən bəri Türkiyə parlamentində təmsil olunur. Onun sözlərinə görə, bu illər ərzində HDP üzvü olan deputatlar PKK terror təşkilatının müdafiəsini etməklə məşğul olublar:

“Bildiyiniz kimi, Türkiyədə PKK terror təşkilatını dəstəkləyən Xalqların Demokratik Partiyasının (HDP) bir neçə üzvü olan deputat saxlanılıb. Onlardan bəziləri barəsində həbs qərarı çıxarılıb. HDP üzvü olan bu deputatlar sağlam müxalifətçilik etmək əvəzinə, Türkiyə parlamentində PKK-nın vəkili missiyasını yerinə yetirlər. İndiyədək dəfələrdə HDP-nin sədri səviyyəsində etiraf olunub ki, bu partiya PKK, PYD və digər terror təşkilatları tərəfindən himayə olunur. Türkiyə milləti də HDP-nin bu hərəkətlərinə sadəcə olaraq səbr nümayiş etdirərək uzun müddət səssiz qalıb. Ancaq bilirsiz ki, bu yaxınlarda toxunulmazlıq statusu olan şəxslərlə bağlı Türkiyə Konstitusiyasında dəyişiklik edilib. Həmin dəyişiklikdən sonra artıq Türkiyədə cinayətlərdə şübhəli bilinən millət vəkilləri istintaqa çağırıla və ifadəsi alına bilir. HDP-çi deputatların həbsi də məhz bu səbəbdən baş verib. Çünki bir neçə gün əvvəl Dövlət Baxçalı və Kamal Kılıçdaroğlu da daxil olmaqla, digər partiya üzvləri ilə yanaşı, HDP üzvü olan deputatlar da ifadə vermək üçün prokurorluğa çağırılıblar. Ancaq Türkiyədə separatçılığı dəstəkləyən HDP millət vəkilləri Türkiyə qanunlarını tanımadıqlarını və bunun üçün də ifadə verməyə gəlməyəcəklərini bəyan ediblər. Buna görə də prokuror həmin millət vəkillərinin saxlanılması, məhkəməyə gətirilib ifadə verməsi və tutulması barədə qərar verib”.

K.Atılgan qeyd edib ki, bu gün HDP-də təmsil olunan bir çox türk adı və soyadı daşıyan şəxslərin əsli ermənilərə bağlıdır:

“Bir çox tarixçilər də konkret faktlarla sübut edib ki, bu gün Türkiyədə dövlət vəzifələrində və siyasi fəaliyyətlə məşğul olan, adı və soyadını dəyişdirərək Türkiyə vətəndaşı kimi tanınan ermənilər var. Fikir verin, Qarabağ kimi, bu gün də Mosul və Kərkük bir qrup güclər tərəfindən işğal edilir, dünyanın xəritəsi dəyişdirilir, regionda yeni dövlətlər qurmaq istəyirlər. Ancaq Türkiyə Silahlı Qüvvələri bölgədə xalqların tarixini süni şəkildə dəyişmək istəyən bu siyasətə qarşı çıxır.

Burada əsas məsələ odur ki, Türkiyə və Azərbaycanda yaşayan kürd vətəndaşlarla PKK terror təşkilatı üzvlərini ayırmaq lazımdır. Çünki bu gün kürd vətəndaşların böyük əksəriyyəti dövlətimizin yanındadır. İndiyədək minlərlə vətənpərvər kürd Türkiyə Silahlı Qüvvələri sırasında düşmənə qarşı döyüşərək, şəhid olub. Bu gün də Türkiyə ordusu sıralarında döyüşən kürdlər PKK terror təşkilatına qarşı mübarizə aparır və döyüşür. Tam əminəm ki, xarici güc dövlətlər olmasa, Türkiyədə PKK problemi ümumiyyətlə olmazdı. PKK-nı yaradan və yaşadan həmin xarici dövlətlərdir. O dövlət PKK vasitəsilə Türkiyəyə təzyiq etmək, onu zəiflətmək istəyir. Ancaq Türkiyə tarixdə olduğu kimi, bu mübarizədən qalib çıxacaq”.

K.Atılgan Azərbaycanın daima Türkiyəyə dəstək verdiyini söyləyib:

“Türkiyənin terrorla mübarizə sahəsində atdığı addımlara qardaş Azərbaycanın dəstək verməsini vacib sayırıq və buna görə Azərbaycan rəhbərliyinə təşəkkür edirik. Türkün türkdən başqa dostu yoxdur. Bunun ən bariz nümunəsini biz qardaş Azərbaycanın timsalında görürük. Türkiyənin atdığı bütün addımlarda Azərbaycan ilk dəstəyi verən dövlətdir. Onsuz da biz hər zaman bu cür dəstəyi ilk olaraq Azərbaycandan gözləyirik”.

Ermənistanın işğalçılıq siyasətinə də toxunan türkiyəli general vurğulayıb ki, Dağlıq Qarabağ gec-tez Azərbaycana qayıdacaq:

“Mən buna inanıram və görürəm ki, Qarabağ gec-tez yenə də Azərbaycanın olacaq. Bu gün Azərbaycan ordusu regionun ən güclü ordusuna çevrilib. Türkiyə də zaman-zaman Azərbaycana hərbi sahədə dəstəyini verir. Ancaq səmimi deyim ki, bu gün işğalçı Ermənistana qarşı müharibə aparmaq üçün Azərbaycanın nə Türkiyəyə, nə də digər ölkələrin hərbi imkanlarına ehtiyacı yoxdur. Azərbaycan ordusu kifayət qədər güclənib, təkmilləşib və bölgənin ən güclü Silahlı Qüvvələrinə çevrilib. Azərbaycanın təkcə hərbi büdcəsi Ermənistanın bütün dövlət büdcəsindən dəfələrlə çoxdur. Bütün bunlara görə də əminliklə deyirəm ki, Azərbaycan yaxın illərdə öz tarixi torpaqlarını işğaldan azad edəcək”.