Elza Seyidcahan yürüşə çıxır

Bəstəkar-müğənni, əməkdar artist Elza Seyidcahan Azərbaycan Respublikasının Dövlət Bayrağı Günü münasibətilə yürüşə çıxacaq.

Bu barədə Ölkə.Az-a sənətçinin özü məlumat verib:

"Bir azdan rəmzi bayram geyimində yürüşə çıxacağam, insanlarla ünsiyyətdə olacağam. Azərbaycan 25 ildir müstəqil dövlətdir, himnimiz, gerbimiz, bayrağımız var. Tarixən bu bayraq uğrunda böyük müharibələrdən keçmişik, əziyyətlər çəkmişik. Yadınızdadırsa, ötən il Siyəzəndə, Şabranda insanlarımıza bukletlər, bayraqlar hədiyyə etmişdim, onlarla ünsiyyət qurmuşdum. Bu gün də o ənənəmə sadiq qalıram. Saat 3-də Fəvvarələr Meydanına çıxıb, vətəndaşlarımızla görüşəcəyəm. Bilirsiniz ki, bu yaxınlarda Dünya Azərbaycanlıları Mədəniyyət Mərkəzinin Ekspertlər Şurasının üzvü seçilmişəm. Sədrimiz dünya şöhrətli yazıçımız Çingiz Abdullayev, vitse prezidentlər Həzi quliyev və Rasim Məmmədovdur. Çox sevinirəm ki, mən də bu təşkilatda varam. Bu gün də Fəvvarələr Meydanında insanlara bukletlər, bayraqlar hədiyyə edəcəyik, onlarla bu günü keçirəcəyik".

Xatırladaq ki, 2009-cu ilin noyabr ayında Dövlət Bayrağı Günü ilə bağlı Əmək Məcəlləsinin 105-ci maddəsinə əlavə edilib. Əlavəyə əsasən, 9 noyabr Azərbaycanda Dövlət Bayrağı Günü elan olunur və bu bayram ölkədə qeyri-iş günü olan bayramların siyahısına daxil edilir.

İntiqam VALEHOĞLU
Ölkə.Az