"ABŞ-da prezidentin ənənəvi siyasi xəttən kənara çıxmaq imkanı yox dərəcəsindədir"

ABŞ-da Donald Trampın prezident seçilməsi birmənalı qarşılanmayıb.

Seçkinin nəticələri elan edildikdən sonra ABŞ-da əhali küçələrə çıxaraq etiraz aksiyaları keçirməyə başlayıb.

ABŞ-da Donald Trampa etirazın əsas səbəbi isə Rusiya ilə əlaqəsinin olmasıdır. Tramp seçki ərəfəsində Rusiya ilə münasibətləri qaydaya qoyacağını bildirib.

Donald Trampın prezident seçilməsi və ABŞ-dakı etirazlar barədə politoloq Qabil Hüseynli Ölkə.Az-da öz fikirlərini bölüşüb:

"ABŞ-da prezident seçkilərinin nəticəsi gözlənilməz oldu. Bəziləri deyir ki, ABŞ seçicisi yeni dəyişiklik istəyir, ancaq dəyişiklik Trampın simasında baş verə bilməz. Tramp ABŞ-da nə dəyişə biləcək? O, verdiyi vədləri yerinə yetirə bilmək iqtidarında deyil.

ABŞ-da etiraz aksiyalarının keçirilməsi təbiidir. Çünki hamı seçkinin nəticələrinin başqa cür olacağını gözləyirdi. Seçkilər ərəfəsində bəzi hakimiyyət strukturları da çox yaramaz hərəkətlər etdilər. Hillari Klintonun 2 dəfə məxfi sənədlərini dövlətin qriflənmiş xətti ilə deyil, özünün şəxsi internet xətti ilə başqa bir ünvana göndərməsini ABŞ Milli Kəşfiyyatının rəhbəri Ceyms Klepper seçkilərə iki gün qalmış prokurorluq orqanlarına iddia ilə çıxış etdi və bunun cinayət hadisəsi kimi qiymətləndirilməsini tələb etdi. Bu da əhalinin əhval-ruhiyyəsinə ciddi təsir göstərdi. Seçkinin nəticəsinin müəyyən edilməsində ABŞ Milli Kəşfiyyatının rolu həlledici oldu. ABŞ əhalisi seçkidən sonra ayıldı. Donald Tramp haqqında mətbuatda Rusiya ilə əlaqələrinin olduğu dərc edildikcə xalq daha da həyacanlandı.

Rusiya mafiyasının ABŞ-da ən güclü mafiyalardan biri olduğu deyilir. Həmin rus mafiyası Trampın tərəfində olub, əhaliyə pul paylayırmış, seçicilər arasında Trampın təbliğatını aparmaqla yanaşı, hətta bəzi adamları qorxutmaqdan belə çəkinməyib. ABŞ-da çoxlu sayda rus yaşayır və onların da Trampın tərəfinə keçməsində rus mafiyasının və səfirliyinin böyük rolu olub. Başqa bir məsələ isə Rusiyanın Hillari Klintonun seçki qərargahına etdiyi kiberhücumlar idi. Kiberhücumlar zamanı ştatlarla Hillari Klintonun seçki qərargahı arasında əlaqə ya pozulurdu, ya da çətinləşirdi. Bütün bunlar onu göstərir ki, seçkilərdə saxtakarlığın olacağını deyən Trampın seçilməsində ABŞ dövlət strukturlarının və Rusiyanın böyük xidməti olub. Əslində seçicilərin onun xeyrinə yönləndirilməsində həm öz dövləti, həm də Rusiyanın xüsusi xidmət orqanları böyük iş görüblər. Bu iş də ölkədə ciddi etirazlara səbəb olub. Etirazlar demək olar ki, ştatların hamısını bürüyüb. Etirazlar dinc xarakter daşıyır, ancaq əsas şüar odur ki, "Tramp, sən bizim prezidentimiz deyilsən".

Hillari Klinton seçkilərin nəticəsini qəbul edib, Trampı da prezident seçilməsi münasibəti ilə təbrik edib. ABŞ praktikasında mitinqlərlə, kütləvi etirazlarla prezidentin hakimiyyətdən qovulması yoxdur. Bütün bunlara baxmayaraq heç bir prezident də etirazlarla qarşılanmayıb, əhali seçkilərin nəticələrini qəbul edib, razılaşıb, hətta əleyhinə səs versələr də onu qəbul ediblər. ABŞ-da əsl gərginlik inaqurasiya prosesindən sonra başlayacaq.

Donald Tramp seçki ərəfəsində Rusiya ilə münasibətləri yaxşılaşdıracağı barədə vəd verib. Əgər Tramp verdiyi vədi yerinə yetirməyə başlasa, Rusiya da eyni zamanda ABŞ-ın müttəfiqlərini təhdid etməkdə davam etsə, bu ABŞ-ın geostrateji maraqlarına zərbə vurmaq demək olacaq və ölkədə etiraz dalğalarının başlamasına səbəb olacaq. ABŞ elə bir dövlətdir ki, orada prezidentin ənənəvi formalaşmış siyasi xəttən kənara çıxmaq imkanı demək olar ki, yox dərəcəsindədir".

Səxavət Məmməd
Ölkə.Az