Vahid Əhmədov: Növbəti il asan olmayacaq
“Növbəti ildə dünya iqtisadiyyatını nə gözləyirsə, Azərbaycan iqtisadiyyatını da o gözləyir.
Dünya iqtisadiyyatında müəyyən problemlər yaşanır. Valyutalar devalvasiyaya uğrayır. Ərzaq qıtlığı yaşanır. O ki, qaldı Azərbaycana, 2017-ci il heç də asan il olmayacaq. Müəyyən çətinliklər bizi gözləyir”.
Ölkə.Az Fins.Az-a istinadən xəbər verir ki, bu sözləri Milli Məclisin İqtisadi siyasət, sənaye və sahibkarlıq komitəsinin üzvü, deputat Vahid Əhmədov deyib.
“Əgər Azərbaycan qeyri-neft sektorunun inkişafını sürətlə inkişaf etdirə bilsə, ixracda müəyyən prosesləri qabaqlaya bilsə, ixracı artıra bilsə, neftdən asılılığını azalda bilsə, ciddi problem olmamalıdır”, - deyə deputat əlavə edib.
V.Əhmədov postneft dövründə qeyri-neft sektorunun inkişaf etdirilməsi məsələsinə də toxunub:
“Qeyri-neft sektorunun inkişafı adi məsələ deyil. Müəyyən qədər vəsait tələb olunur. Bunu çoxdan başlamaq lazım idi. 2004-cü ildə prezident bununla bağlı müvafiq göstərişlər vermişdi. Amma bu müddətdə ciddi işlər görülmədi. Yalnız indi sənaye obyektləri yaradılır ki, müəyyən qədər inkişaf etsin. Yəni, vaxt lazımdır”.
