Mişel Obama "dikdaban geyinmiş meymuna" bənzədildi

ABŞ prezidenti Barak Obamanın həyat yoldaşı Mişel Obamanın "dikdaban ayaqqabı geyinmiş meymuna" bənzədilməsi sərt reaksiyalara səbəb olub.

Ölkə.Az xəbər verir ki, ABŞ-a 70 mindən çox sosial şəbəkə istifadəçisi Birinci Xanımı meymuna bənzədən Kley şəhərinin inkişaf və əməkdaşlıq idarəsinin direktoru Pamela Teyloru irqçilikdə günahlandıraraq istefasını tələb edib.

Şəhər sakinləri tərəfindən Teylor və Bələdiyyə sədri Beverli Volinqin qovulması üçün başladılan imza kampaniyasında 14 min sakin iştirak edib.

Teylor prezident seçkilərindən sonra "Facebook" səhifəsində "Ağ evdə şıq, gözəl və zərif bir xanım görmək çox xoş olacaq. Dikdaban ayaqqabı geyinmiş meymun görməkdən bezmişdim" fikrini yazıb. Bələdiyyə sədri Beverli isə Teylorun bu statusuna "Günümü gözəlləşdirdin, Pam" deyə rəy yazıb.

Dövlət məmurları yerli əhalinin sərt reaksiyasından sonra mesajları silmişdilər. Velinq irqçi olmadığını, sadəcə Ağ Evdə baş verən dəyişiklik üçün şad olduğunu dilə gətirdiyini bildirib.

Teylor isə gözəlliyə aid şəxsi fikrini paylaşdığını bildirib: "Əgər fikrimi səhv başa düşüblərsə, üzr istəyirəm".

Hikmət
Ölkə.Az