Azərbaycanlı polkovnik-leytenantdan KOMANDANLIĞA
Miq.az xəbər verir ki, bir müddət əvvəl Azərbaycan Silahlı Qüvvələrinin zabiti, 1979-cu il təvəllüdlü polkovnik-leytenant Ruslan Telman oğlu Alıkişiyev ağır vəziyyətdə olduğundan valideynləri tərəfindən kömək üçün ictimaiyyətə müraciət olunmuşdu.
Bu gün saytın əməkdaşı polkovnik-leytenant Ruslan Alıkişiyevlə əlaqə saxlayaraq səhhəti ilə maraqlanıb.
Əslən Cəbrayıl rayonundan olan polkovnik-leytenant Ruslan Alıkişiyev 1993-1996-cı illərdə C.Naxçıvanski adına Bakı Hərbi Liseyində, 1996-2000-ci illərdə Azərbaycan Respublikası Silahlı Qüvvələrinin Hərbi Akademiyasında təhsil alıb. Zabit kimi Gədəbəy, Qazax, Göygöl və Naxçıvanın düşmənlə sərhəd bölgələrində torpaqlarımızın müdafiəsində iştirak edib.
Xidmət zamanı mayor Alıkişiyevdə qan xərçəngi xəstəliyi aşkarlanıb. Bakıdakı Qanköçürmə İnstitutunda 2 kurs müalicə olunduqdan sonra 15 iyun 2015-ci il tarixində zabitimiz Alıkişiyev müalicə olunması üçün Müdafiə Nazirliyi tərəfindən qardaş Türkiyənin Gülhanə Hərbi Tibb Akademiyasına göndərilib.
Həkimlərin diaqnozuna görə, zabitimizin sağalması üçün ona mütləq şəkildə ilik köçürülməli imiş. Bu köçürülmə üçün donor Amerikadadır və ümumilikdə iliyin köçürülməsi, müalicənin tam aparılması və zabitimizin sağlamlığına qovuşması üçün 250 000 ABŞ dolları tələb olunurdu. Bu vəsaitin ödənilməsi isə məcbur köçkün olan Alıkişiyevlər ailəsinin maddi imkanları xaricində olduğundan Müdafiə Nazirliyinin koməkliyi nəticəsində bütün xərclər ödənilib.
Polkovnik-leytenant Ruslan Alıkişiyev bildirdi ki, sağlamlığı tam bərpa olunub və bu işdə ona kömək edən Azərbaycan Respublikası Müdafiə Nazirliyinə, Naxçıvan Əlahiddə Ümumqoşun Ordusunun komandanlığına, hərbçi dostlarına, mülki insanlara, bir sözlə bu işdə ona kömək edən bütün insanlara ailəsi adından dərin təşəkkürünü bildirir.
"Azərbaycan vətəndaşları arasında, zabitinə qayğı göstərən ordu rəhbərliyinin formalaşmasında xidmətləri danılmaz olan Ali Baş Komandan İlham Əliyevə təşəkkürümü bildirirəm. Bütövlükdə keşiyində durduğum, sinəmi həmişə SİNƏSİNƏ sipər etdiyim xalqımı, onun övladlarını bağrıma basıram. Mənim sağalmağımda xidməti olan bütün insanlara xüsusi təşəkkür edirəm!",- deyə polkovnik-leytenant bildirib.
İllərdir Vətənimizin, dövlətimizin keşiyində duran və bundan sonra da Azərbaycana, onun dövlətinə, millətinə sadiq olacağına əmin olduğumuz zabitimiz polkovnik-leytenant Ruslan Alıkişiyevə həmişə sağlam həyat arzulayırıq.
Qeyd edək ki, polkovnik-leytenant Ruslan Alıkişiyevin böyük qardaşı Pəhlivan Alıkişiyev də torpaqlarımızın bütövlüyü uğrunda gedən döyüşlərdə iştirak edib və öz sağlamlığını itirib, 2-ci qrup əlildir.
