Telman İsmayılovun qardaşı həbs edildi
Məşhur azərbaycanlı biznesmen, AST şirkətlər qrupunun prezidenti Telman İsmayılovun qardaşı Moskvada həbs olunub.
Ölkə.Az Rusiya mediasına istinadən xəbər verir ki, Rafiq İsmayılov artıq həbs olunub. Onu Moskvada tanınmış biznesmenlər, ticarət mərkəzləri şəbəkəsinin sahibi Vladimir Savkinin və "Lyublino motors" şirkətinin rəhbəri Yuri Brilyovun qətlində ittiham edirlər.
Rafiq İsmayılovla birlikdə killer Mehman Kərimov də həbs edilib.
Xatırladırıq ki, adı çəkilən moskvalı iş adamları eyni vaxtda Moskvada bu ilin may ayının 16-da qətlə yetiriliblər. Öldürülən biznesmen Vladimir Savkinlə Rafiq İsmayılovun arasında konflikt yaranıb. Daha sonra Rafiq İsmayılov killer Mehman Kərimovu qətlin baş verdiyi yerə özü, oğlu Raul İsmayılova məxsus "mersedes" markalı maşınla gətirib. Mehman Kərimov Savkinlə Moskvadakı yanacaqdoldurma məntəqələrindən birinin yaxınlığında görüş təyin edib. Savkin isə görüşə öz dostu, "Lyublino motors" şirkətinin direktoru Yuri Brilyovala gəlib. Təyin olunmuş yerə çatan rus biznesmenlər Mehman Kərimovu maşınlarına oturdub və şəhərdən kənara çıxıblar. Şəhərdən çıxdıqdan sonra Mehman Kərimov Savkinlə Brilyovu gülləyərək hadisə yerindən uzaqlaşıb.
Faktla bağlı araşdırmalar davam edir.
