Türkiyə NATO-dan çıxacaqmı?

Türkiyə prezidenti Ərdoğan Avropa İttifaqına alternativ olaraq Şanxay Əməkdaşlıq Təşkilatına işarə etdi.

Ölkə.Az xəbər verir ki, Türkiyə 53 ildir Aİ-yə üzv olmaq üçün gözləyir və bu səbəbdən ŞƏT alternativ qurum olaraq göstərilib. ŞƏT-ə üzv olan 5 ölkə sayı bu yaxınlarda artaraq 8-ə çatacaq.

Təşkilata üzv ölkə liderləri ildə bir dəfə zirvə toplantısı keçirərək təhlükəsizlik məsələsini müzakirə edir. Daşkənd Zirvə toplantısında Hindistvan və Pakistan quruma qəbul edilib. 2017-ci ilə planlaşdırılan Astana zirvəsində isə bu iki dövlətin təşkilata tam üzv kimi qəbul edilməsi gözlənilir. ŞƏT-ə üzv ölkələrin əhali sayı 3 milyard 40 milyon nəfərdir.

Bu gün Monqolustan, İran, Əfqanıstan və Belorusiya müşahidəçi qismində təşkilata üzv olmaq istəyir. 2017-ci ildə İranın da ŞƏT-ə qəbul ediləcəyi bildirilib.

Türkiyə hələlik ŞƏT qapısından çox uzaqdadır. Türkiyə təşkilatda dialoq tərəfdaşı statusundadır. Türkiyədən başqa Azərbaycan, Kamboca, Nepal, Şri Lanka və Ermənistan da bu statusa sahibdir.

Rusiyalı rəsmilər Ərdoğanın açıqlamaları ilə bağlı: "Türkiyə NATO üzvü statusu ilə ŞƏT-ə tam üzv ola bilməz. Bu zaman bir çox hüquqi ziddiyət ortaya çıxa bilər. Rəsmi Ankara həqiqətən də ŞƏT-ə üzv olmaq istəyirsə, NATO-dan çıxmalıdır. Bundan başqa ŞƏT Aİ kimi iqtisadi qurum deyil. Aİ iqtisadi birlik, ŞƏT isə təhlükəsizlik təşkilatıdır.

Əgər Türkiyə yaxın gələcəkdə ŞƏT üzvü olmaq istəsə, onun müraciəti bütün dövlətlər tərəfindən qəbul edilməlidir. Rusiya, Qazaxıstan, Qırğızıstan və Tacikistan Türkiyənin müraciətinə isti münasibət göstərsə də, Çin bu müraciətə soyuq yanaşır. Bu soyuqluğun əsas səbəbi uyğur məsələsidir.

Hikmət
Ölkə.Az