"Avropa ölkələri Qarabağ probleminin həlli üçün heçnə edə bilməzlər"

2017-ci ilin yanvar ayında ATƏT-in sədrliyi Avstriyaya keçəcək.

Rəsmi Vyana Ermənistan və Azərbaycana münaqişəni dinc yolla nizamlamaq üçün vasitələr axtarmağa kömək etmək üçün hazırdır.

Bu sözləri Avstriyanın xarici işlər naziri Sebastyan Kurts deyib. Kurts bildirib ki, Vyana may ayında sammitin paytaxtı olacaq və Avstriya tərəfi danışıqlar aparmağa hazırdır. Avstriya Minsk qrupunun üzvü olmasa da, prosesi dəstəkləmək üçün əlindən gələni edəcək. Nazir eyni zamanda münaqişənin hərb yolu ilə yox, sülh yolu ilə həll edilməsinin tərəfdarı olduğunu bildirib: "Tərəflər əməkdaşlıq üçün maksimum səy göstərməlidirlər. Məsələ hərb yolu ilə yox, diplomatiya ilə həll edilməlidir".

Avstriyanın xarici işlər naziri Sebastyan Kurtsun səsləndirdiyi fikrə politoloq Zərdüşt Əlizadə Ölkə.Az-da münasibət bildirib:

"Bu bir mərasimdir. Mərasimə görə hər 6 aydan bir ATƏT-in sədri olacaq ölkənin xarici işlər nazirləri öz ölkəsinin ATƏT sədrliyi dövründə problemlər üçün bütün səylərini səfərbər edəcəklərini bəyan edir. Həllini gözləyən münaqişələr içərisində Dağlıq Qarabağ problemi də var. Gəlin etiraf edək ki, ATƏT sədri olan dövlətin xarici işlər nazirinin, həmin dövlətin və ATƏT kimi təşkilatların əlində heç bir imkan yoxdur ki, münaqişəni həll etsin.

Hamıya bəllidir ki, Dağlıq Qarabağ müşkülü böyük dövlətlərin, Fransa, Rusiya və ABŞ-ın nəzarətindədir. Ona görə də, İsveç, Macarıstan, Avstriya, Almaniya Dağlıq Qarabağ probleminin həlli üçün ciddi nə isə edə bilməzlər. Dağlıq Qarabağ münaqişəsini Rusiya həll edə bilər. Bu məsələdə bir qədər ABŞ-ın və Fransanın rolu ola bilər. Əsas işi isə Ermənistan və Azərbaycanın dövlət başçıları görə bilərlər. Onlar isə Moskvadan asılıdırlar. Ona görə də heç nə edə bilməzlər.

Bu cür mərasim, ayin tipli bəyanatlara fikir vermək lazım deyil".

Səxavət Məmməd
Ölkə.Az