"Heydər Əliyev siyasəti Azərbaycanda yaşayır və qalib gəlir"
Meksikanın Veracruz ştatının paytaxtı Xalapa şəhərində yerləşən Veracruz Universiteti tərəfindən təşkil olunan “V Beynəlxalq-Regional Elmi, Bədii və Sənətkarlıq Sərgisi"ndə iştirak etmək məqsədilə, Universitetin dəvətinə əsasən AR Meksikadakı Səfirliyinin müvəqqəti işlər vəkili Mehriban Səmədova və Türkiyənin Meksikadakı səfiri Mustafa Oğuz Demiralp Xalapa şəhərində səfərdə olmuşdurlar.
Tədbir çərçivəsində Türkiyənin Meksikadakı səfiri Mustafa Oğuz Demiralp Veracruz Universitetində ölkəsi barədə çıxış etdikdən sonra, səfirliyin müvvəqəti işlər vəkili Mehriban Səmədova Azərbaycan haqqında çıxış etmişdir. M.Səmədova, bu kimi vasitələrlə müasir qloballaşma dövründə planetin ayrı-ayrı hissələrində yerləşən iki ölkə və Amerika ilə Avrasiya kimi iki qitə arasında informasiya və fikir mübadiləsinin aparılmasında tərəflərin bir-birini kənar təsirlərin müdaxiləsi olmadan daha yaxından tanıması üçün bir körpü olduğunu toplantı iştirakçılarının diqqətinə çatdırmışdır. Azərbaycanın cavan bir respublika olmasına baxmayaraq çox zəngin, qədim tarix və mədəniyyətə malik olduğunu qeyd etmişdir. Azərbaycanın ictimai-coğrafi mövqeyi haqqında danışan Mehriban Səmədova ölkəmizin tarixi qədim ticarət yolları üzərində yerləşdiyini, bu gün Avropa və Asiya qitələri arasında körpü rolu oynadığını nəzərə çatdırmışdır. Eyni zamanda M.Səmədova bildirmişdir ki, ölkəmizin Latın Amerikası regionu ilə son illərdə əməkdaşlığı xüsusilə məhsuldar olmuş və yüksələn xətlə inkişaf etmişdir. Sonra o, Azərbaycan Xalq Cümhuriyyətinin yaranma tarixi və onun Şərqin ilk demokratik respublikası olaraq dünya dövlətçilik və demokratiya tarixinə töhfələrindən bəhs edərək bildirmişdir ki, Azərbaycanda respublikanın yaradılması böyük tarixi hadisə idi. Çünki əsrlər boyu müstəqillik və azadlıq arzusunda olan Azərbaycan xalqı artıq buna nail olmuşdu. Həmçinin o, qeyd etmişdir ki, Azərbaycan qadınlara bərabər səsvermə hüququ vermiş ilk beş ölkədən biri idi. Qısa zaman ərzində mövcud olmasına baxmayaraq, Azərbaycan Xalq Cümhuriyyəti beynəlxalq ictimaiyyət tərəfindən tanınmağa və demokratik təsisatların, o cümlədən parlament və çoxpartiyalı hökumətin yaradılmasına nail olmuşdur. Lakin iki il sonra çətin mübarizə şəraitində qurulmuş Azərbaycan Xalq Cümhuriyyəti Bolşeviklərin hücumuna məruz qalaraq Azərbaycan Sovet Sosialist Respublikası adı altında SSRİ-nin tərkib hissəsi oldu.
Daha sonra M.Səmədova, Ulu Öndər Heydər Əliyevin həm SSRİ-də həm də Azərbaycan müstəqil olduqdan sonra çətin bir dövrdə hakimiyyətə gəlişi ilə Azərbaycanın maarifçilik, iqtisadi və mədəni həyatında intibah dövrü olduğunu qeyd edərək, Heydər Əliyevin hakimiyyətdə olduğu dövrdə əldə etdiyi uğurlardan, müstəqil Azərbaycan dövlətinin qurulmasından, milli dövlətçiliyin əsasının qoyulmasından danışmışdır. Həmçinin bildirmişdir ki, bu gün Azərbaycana Heydər Əliyev yolunun layiqli davamçısı İlham Əliyev başçılıq edir, Heydər Əliyev siyasəti Azərbaycanda yaşayır və qalib gəlir. Çıxışının davamı kimi, M.Səmədova ölkəmizdəki tolerantlıq mühitindən danışaraq bildirmişdir ki, Azərbaycan minilliklər boyu müxtəlif xalqların azad, sərbəst və heç bir maneə ilə rastlaşmadan yaşadığı bir ölkədir. Azərbaycan dini baxımından müsəlman ölkəsi olmaqla yanaşı, ölkəmizdə dini azlıqların hüquqlarının qorunması və təminatı sahəsində çox mühüm və ciddi addımlar atılıb. Bu gün ölkəmizdə bütün millətlərin və dinlərin nümayəndələri tam qarşılıqlı anlaşma, ləyaqət, əmin-amanlıq, milli həmrəylik şəraitində yaşamaları üçün bütün şərait yaradılmışdır və 2016-cı ilin Azərbaycanda "Multikulturalizm ili" elan edilməsi haqqında Azərbaycan Respublikası Prezidentinin imzaladığı Sərəncam ölkəmizdə multikultural və tolerantlıq mühitinə olan münasibətin real ifadəsidir. M.Səmədova ölkəmizin neft və qaz emalı tarixi, enerji siyasəti, Əsrin müqaviləsi, habelə enerji sektorunda həyata keçirilən beynəlxalq əməkdaşlıq layihələri, Bakı-Tbilisi-Ceyhan və Bakı-Tbilisi-Ərzurum boru kəməri xətləri, infrastruktur layihələrinin icrası, qeyri-neft sektorunun inkişafı və bu sektora dövlət dəstəyi, ölkəmizin informasiya kommunikasiya texnologiyaları sahəsində əldə etdiyi nailiyyətlər və insan inkişafı indeksi haqqında iştirakçıları məlumatlandırmışdır. Həmçinin o, qeyd etmişdir ki, Azərbaycan dünya tarixində ilk neft istehsal edən ölkə olaraq bu istiqamətdə böyük təcrübəyə malikdir və hazırda Avropa ölkələrinin enerji təhlükəsizliyinin təmin edilməsində strateji rol oynayır.
Sonra slayd-prezentasiya ilə çıxış edən səfirliyin III katibi Vüsal Ələkbərli Azərbaycanın turizmi, təbiəti, mədəniyyəti haqqında ətraflı şəkildə bəhs etmişdir. Azərbaycanın coğrafi mövqeyi barədə məlumat verərək bildirdi ki, 11 iqlim qurşağından 9-u məhz Azərbaycanın ərazisindən keçir. Bunun nəticəsidir ki, paytaxt Bakı ilə yanaşı bölgələrdə də beynəlxalq standartlara cavab verən müasir turizm infrastrukturu yaradılıb. Bakı barədə danışaraq qeyd etmişdir ki, Xəzər dənizinin sahilində yerləşən bu müasir şəhər qədimlik və müasirliyi özündə ehtiva edir. O, Bakının İçərişəhər kimi qədim mədəni-tarixi irsə malik olması ilə yanaşı, eləcə də Heydər Əliyev Mərkəzi, Alov Qüllələri, Bakı limanı, Park Bulvar kimi müasir memarlıq əsərlərinə malik olduğunu diqqətinə çatdırmışdır. Bakıda çoxsaylı muzey və abidələrin olduğunu, İçərişəhər tarix-memarlıq qoruğunun Qız qalası və Şirvanşahlar saray kompleksi ilə birlikdə UNESCO-nun Dünya İrs Siyahısına daxil edildiyini bildirdi. Həmçinin ölkəmizin Gəncə, Şəki, Quba, Lənkəran, Naxçıvan, Qobustan kimi bölgələri, eləcə də, yanardağ və palçıq vulkanları bərədə söhbət açaraq, əhəmiyyətli turistik məkanlar olduğunu diqqətə çatdırmışdır. O, qeyd etmişdir ki, görülən işlərin nəticəsi olaraq son illərdə ölkəmizə gələn turistlərin sayında önəmli dərəcədə artım qeydə alınıb. Eyni zamanda V.Ələkbərli, Azərbaycanın qlobal əhəmiyyətli nəqliyyat və infrastruktur layihələri, ölkəmizdə keçirilən V Bakı Beynəlxalq Humanitar Forumu, ölkəmizin 2015-ci ildə Avropa Oyunlarına, Formula 1 Avropa Gran Pri 2016 yarışına və digər önəmli tədbirlərə ev sahibliyi etməsi barədə məlumat vermişdir. Tədbirin yekununda iştirakçılarının müxtəlif sahələrdə yönəltdikləri suallar cavablandırılmış, xatirə şəkli çəkdirilmişdir.
Səfər çərçivəsində Xalapa şəhəri Bələdiyyəsinin sədri Ameriko Zunyiqa Martinez, eləcə də, Veracruz Universitetinin nümayəndələri, Meksikanın “ProMexico” Ticarətin və İnvestisiyaların Təşviqi Agentliyinin nümayəndəsi Luis Manuel Kuevas Padiya, Xalapalı İş adamları Şurasının sədri Luis Palasios Macedo, “Nuestro Municipio” İctimai Birliyinin sədri Nikanor Moreira Ruiz və Xalapa şəhəri Ticarət palatasını sədri Xerardo Libreros Kobos ilə görüş keçirilmişdir. Müqabil tərəf, Veracruz ştatınında xüsusilə turizm, yol inşaatı və iqtisadi sahədə əməkdaşlıq üçün yaxşı imkanların mövcud olduğunu bildirərək, ABŞ-da Donald Trumpın prezident seçkilərində qalib gəlməsindən sonra Meksikanın çox narahat olduğunu qeyd etmiş, ölkənin yeni alternativ əməkdaşlıq yolları axtardığını vurğulamışdır. Bu baxımdan, Meksikanın iqtisadi cəhətdən ABŞ-dan asılılığı azaltması məqsədilə əməkdaşlıq üçün yeni ölkələrə, xüsusilə də Avropa ölkələrinə yönəldiyini nəzərə çatdırmışdır. Qeyd olunmalıdır ki, Meksika iqtisadiyyatında ixracatın 70%-i, idxalatın 50%-i ABŞ-la aparılır. Daha sonra tərəflər ölkələrimiz arasında əməkdaşlığın müxtəlif istiqamətlərdə inkişaf etdirilməsi üçün qarşılıqlı marağın olmasının və ticarət dövriyyəsinin artırılmasının önəmini qeyd edərək iqtisadi əməkdaşlıq imkanlarının araşdırılmasının əhəmiyyətini vurğulamışdır. Görüşdə həmçinin ölkələrimiz arasında əlaqələrin genişləndirilməsində hüquq-müqavilə bazasının gücləndirilməsinin zəruriliyi diqqətə çatdırılmış, sərmayələrin təşviqi və qarşılıqlı qorunması, ikiqat vergi tutmanın aradan qaldırılması haqqında saziş layihələri üzərində iş aparılmasının önəmi qeyd olunmuşdur. Eyni zamanda hər iki ölkə arasında təhsil sahəsində əməkdaşlıq imkanları barədə fikir mübadiləsi aparılmışdır.
Tədbir zamanı V.Ələkbərli Veracruz ştatının “Al Calor Politico” qəzetinə müsahibə vermişdir. Bildirmişdir ki, Azərbaycan Meksika ilə əməkdaşlığın müxtəlif istiqamətlərdə, xüsusilə turizm və iqtisadi sahədə əməkdaşlıqda maraq göstərir. Ticarət dövriyyəsinin artırılmasının önəmini qeyd edərək iqtisadi əməkdaşlıq imkanlarının araşdırılmasının əhəmiyyətini vurğulamış, həmçinin ölkələrimiz arasında əlaqələrin genişləndirilməsində hüquq-müqavilə bazasının gücləndirilməsinin zəruriliyi diqqətə çatdırmışdır.
Müsahibə ilə aşağıdakı link vasitəsilə tanış olmaq mümkündür:
