Üçüncü Reyxin Tibet avantürası

Məlum olduğu kimi Üçüncü Reyxin xüsusi xidmət orqanları və gizli təşkilatları sehrbazlıqla məşğul olmağa can atırdılar. Təbii ki, Tibet onları maraqlandırırdı. Almanlar qədim xalqın gizli biliklərinə yiyələnmək istəyirdilər.

Tibetə təşkil edilən alman tədqiqatlarının nəticələri bu gün də gizli saxlanılsa da, müəyyən məlumatları Ölkə.Az oxucuları ilə bölüşmək qərarına gəldik.

Birinci onu qeyd edək ki, Almaniya hökuməti bu bilgiləri 2035-ci ildə açıqlayacağını bildirir. Bu vaxta qədər bütün sənədlər gizli saxlanılacaq.

İlk addımlar

Almanların Tibet layihəsi 1922-ci ildə Karl Haushoferin təşəbbüsü ilə yarandı.

Almaniyaya səfər edən bir neçə Tibet lamasından istifadə etmək istəyən Karl müəyyən biliklərə sahib olmaq istədi. Onun fikrinə görə, “Şərq şəbihləri tələbəsi” titulunu daşımaq böyük şərəf idi. Karl iddia edirdi ki, Tibet yeni Almaniya Reyxinə mistik qüvvə bəxş edə bilər.

Tezliklə Haushofer Berlində Tibet cəmiyyəti qurdu. 1926-cı ildə Hitler Tibet mədəniyyəti və mifologiyası ilə tanış oldu. Bu ölkənin tarixi və əsasən də sirli Şambala nasist lideri əfsunladı.

Şambala-dünyanı idarə edən qüvvə

Şambala haqda fransız Rene Qiyon yazırdı:

“Atlantidanın məhvindən sonra əvvəlki sivilizasiyanın Ali Müəllimləri (Mahatmalar), Biliklərin əfəndiləri, Kosmik Düşüncənin övladları mağaralara köçdülər.

Burada onlar iki qola: sağ və sol inanc qollarına ayrıldılar. Sağ qol Aqartxi (gizli xeyir mərkəzi) bəşəriyyətin işlərinə qarışmayaraq seyrlə məşğul idi. Sol qol Şambala (gizli qüdrət mərkəzi) bədbəxtlikləri və insan kütlələrini idarə edirdi. Sehrbazlar və sərkərdələr, Dünya xalqlarının rəhbərləri qurban gətirərək Şambala ilə müqavilə bağlaya bilərlər”.

Təbii ki, kosmik qüvvələrlə ittifaq qurmaq istənilən hökmdarın arzusu idi.

Beləcə Haushofer müəmmalı Şambala ilə əlaqə qurmağa çalışdı. Sonradan Ernst Şeffer bu işlə məşğul oldu.

Ernst Şeffer və ekspedisiya

Şeffer 1910-cu ildə yapon silahları və Çin çini qabları kolleksiyası yığan bir ailədə anadan olub. Gimnaziya təhsilini başa vuran Şeffer universitet təhsilinə başlayır.

1931-ci ildə o, Tibetə yollanır. Rəsmi olaraq Şeffer Dolan ekspedisiyasının üzvü idi və bu səfərə zooloq kimi çıxmışdı.

Heyətdə heçkəs onun şərqşünas olduğunu, Henrix Gimmlerlə şəxsi tanışlığının olduğunu bilmirdi. Şefferin gizli rəhbəri zooloqa sirli Şambalanı tapmağı əmr etmişdi.

Yürüş Myanmada başladı və vətəndaş müharibəsi gedən Çində başa çatdı. Dolan da daxil olmaqla ekspedisiyanın bir çox üzvü həlak oldu. Şeffer sağ qalanlara rəhbərlik edərək irəliyə doğru hərəkət etdi. Ekspedisiya bu vaxta qədər heç bir avropalının ayağı dəyməyən rayonlarda oldu. Tezliklə Almaniyaya qayıdan Şeffer “Budda və ayıların dağı” adlı kitab yazdı. Bu kitabda çox çətin və məşşəqətli keçən səfərdən bəhs edirdi.

Səyyahlar Xuanxe və Yantszı çaylarının mənbəyində oldular. Sıldırımlar, keçilməz çaylar, dağlıların hücumu ekspedisiyanı dayandıra bilmədi. Ekspedisiya uğur əldə etsə də, gənc alimin sirli missiyasının nəticələri bu günə qədər də müəmma olaraq qalır. Məlum olan odur ki, Gimmler razı qalmışdı. 1933-cü ildə Anenerbe institutu təsis ediləndə Şeffer aparıcı elmi əməkdaş kimi dəvət edilir.

İkinci ekspedisiya

Şeffer 1935-ci ildə Tibetə ikinci ekspedisiya təşkil edir. Tədqiqat Filadelfiya dəqiq elmlər akademiyası tərəfindən maliyyələşdirildiyi üçün ekspedisiya üzvlərinin yarısı amerikalılardan təşkil edilmişdi. Amma Tibet sərhəddini keçdikdən sonra Şeffer yad gözlərdən qurtulmaq üçün amerikalı və alman qruplar arasında münaqişə yaratdı. Amerikalılar geriyə qayıtdılar. Şefferin rəhbərliyi altında alman qrup Yantszı və Mekonqun mənbəyinə çatdı.

İkinci ekspedisiya da uğurlu idi. Tədqiqatçılar elmə məlum olmayan heyvan və bitki növləri kəşf etdilər.

Yeni institut və üçüncü ekspedisiya

Reyxin elm dairələrində məşhurluq əldə etdikdən sonra ona Anenerbe tərkibində Tibet bölməsi yaratmaq tapşırıldı. Ekspedisiya nəticəsində minlərlə Tibet əlyazması SS-in əlinə keçmişdi.

1938-ci ilin 10 sentyabr tarixində SS reyxsfüreri Henrix Gimmler Tibet bölməsinin rəhbəri ilə görüşür. SS rəhbərinin kabinetində keçən iclas zamanı yeni ekspedisiyanın tarixi və məqsədi müəyyənləşdirildi.

Rəsmi olaraq ekspedisiya Tibetin flora və faunasını öyrənmək üçün təşkil edilmişdi. Amma onun heyətinə Reyxin xüsusi xidmət orqanı əməkdaşları, radioəlaqə üzrə mütəxəssislər və SS-lə əlaqəsi olan alim şərqşünaslar daxil edilmişdi.

Bu dəfə də qeyri-rəsmi tapşırıq barədə məlumat verilmədi. Almanlar Tibet Şambalası ilə əlaqə qurmaq istəyirdilər.

Dalay-lamanın Lxasdakı mülkündə daim fəaliyyətdə olan radio stansiya quraşdırıldı. Bu qurğu mühəndislər, radistlər və s.tərəfindən işlədilirdi.

Ola bilər ki, onların fəaliyyətinin başqa məqsədi var idi. Çünki Almaniya uzaq müttəfiqi Yaponiya ilə radio əlaqəni yaxşılaşdırmaq istəyirdi. Bunun üçün isə Tibetdəki zirvələrin birində SS laboratoriyalarında hazırlanmış qurğu quraşdırılmalı idi. Ərazi minalanmalı, texniki heyət məhv edilməli idi. Bu qurğunun mövcudluğunu birbaşa sübut edən faktlar bu gün də mövcud deyil. Amma ingilis kəşfiyyatının 1942-ci ilə aid sənədlərində Tibetdəki alman ötürücüsünü məhv etmək üçün xüsusi dəstə ayrılması barədə bilgilər var.

Sənədə əsasən, yola çıxan ingilis xüsusi xidmət orqanı əməkdaşları ərazini tapsalar da, minalar partlayır və milyonlarla ton daş kütləsi ərazini görünməz edir.

Ötürücü quraşdırıldıqdan sonra Şefferin ekspedisiya qrupu Tibetin paytaxtına səfər edir. Tibetin hakimi Kvotuxtu Şeffer vasitəsilə Hitlerə məktub yollayır: "Çox hörmətli Almaniya hakimi, böyük dövlətlərin canişini, cənab Hitler! Qoy hər zaman sağlamlıq, xoşbəxtlik, sevinc, və mərhəmət sizi izləsin! İndi siz irqi əsaslara dayanan böyük bir dövlət qurmaq üçün əziyyət çəkirsiniz.

Sizin nümayəndəniz Şeffer Tibetə səfəri zamanı heç bir çətinliklə qarşılaşmayıb. Ona şəxsi dostluq münasibətləri qurmaqda kömək etmişik. Biz ümid edirik ki, bizim dövlətlər arasında dostluq münasibətləri daha da genişlənəcək. Əlahəzrət Hitler, bizim sözlərimizi gələcək dostluğumuza atılan körpü kimi qəbul edin. Mən buna sizi əmin edirəm!"

Məktub 1939-cu ildə yazılıb (Tibet yer dovşanı ilinin birinci ayının 18-ci günü-red).

Məktubdan sonra Lxas və Berlin arasında radioəlaqə quraşdırıldı. Kvotuxtu Şefferə hədiyyələr verdi və bunları Hitlerə çatdırmağı xahiş etdi. Bu hədiyyələr qiymətli qaşlarla bəzənmiş gümüş piyalə, ipək şərf və xüsusi cinsdən olan Tibet köpəyi idi.

Şeffer qonaqpərvərlikdən razı qalmışdı.

Budda rahiblərinin rituallarını incələyən Şeffer arilərin ritualları ilə ortaq nöqtələr tapdı. Bu isə nasist elminin ruhuna uyğun idi. Təbii ki, Şeffer Şambalanı da axtardı.

Orta əsrlərə aid xəritələrdən istifadə edən alman şərqşünası, professor Albert Qryünvedel eyni zamanda gizli Şərqin mistik qüvvələri ilə maraqlanan Blavatskaya və Rerixovun əsərlərinə əsaslanaraq hərəkətə başladı. Alimin fikrinə görə, Şambalaya keçid Kançencanqi dağları arasında yerləşir.

Şayiələrə əsasən, Şefferin ekspedisiyası bu keçidə səfər edib. Deyəsən səfər uğursuz alınmamışdı. Şambalaya keçidi almanlar tapa bilməsələr də, anlaşılmayan dildə olan sirli radio yazılar var idi. Bu radio yazılar demək olar ki, o dövrdə istifadə edilməyən ultraqısa dalğa diapazonunda idi. Amma bu yazıların saxlanıldığı maqnitafon lentləri ya yoxa çıxdı, ya gizlədildi.

Yeni ekspedisiya

Tibet ekspedisiyasının böyük hissəsi 1939-cu ilin yay aylarında Almaniyaya qayıtdı. Münhendə Şefferi qəhrəman kimi qarşıladılar. Təntənəli görüşdə SS reyxsfüreri Henrix Gimmler şəxsən iştirak edirdi.

Ekspedisiyadan qayıtdıqdan iki gün sonra nasist rəhbərliyi Tibetə hərbi sursat və elmi cihazlarla təchiz edilmiş böyük bir ordu və alim heyəti göndərmək qərarına gəlir. Amma müharibənin başlaması bu plana mane olur.

Laplandiya və ya Giperborey

1941-ci ildə Şeffer “Laplandiya” adlı gizli bir layihədə iştirak edir. Bu dəfə hadisələr Tibetdə yox, Finlandiyada cərəyan edirdi. Şayiələrə əsasən, almanlar avropalıların mifoloji vətəni, Arktida-Giperboreyin axtarışları ilə maraqlanırdılar. “Laplandiya” layihəsinin incəlikləri barədə bu gün də məlumat yoxdur. Çünki almanların əsl məqsədinə şahidlik edən heç bir sənəd saxlanılmayıb.

Sonuncu ekspedisiya

1943-cü ildə Şeffer Tibet mövzusuna yenidən qayıdır. “Sirli və dost Tibet” kampaniyasına başlayan Gebbels onun biliklərinə ehtiyac duyurdu. Kampaniya başa çatdıqdan sonra Şeffer yoxa çıxır. O, Tibetə, Himalay dağlarının altında mürgüləyən sirli qüvvələrlə əlaqələri bərpa etmək üçün göndərilmişdi? Bunu heç kəs bilmir. Amma 1945-ci ilin may ayından sonra Almaniyaya qayıtmaq olmazdı. Eyni zamanda müharibədə qalib gəlmiş dövlətlərin xüsusi xidmət orqanları Şefferlə maraqlanırdılar. Onlar həm də Reyxə xidmət göstərən tibetlilərlə də maraqlanırdılar.

Hitler hakimiyyətə gəlmədən əvvəl Almaniyada bir çox tibetli yaşayırdı. Bir neçə böyük şəhərdə onlar cəmiyyətlər qurmuşdular. Dini və dünyəvi tibetli xadimlər əsasən Münhen və Berlində yaşayırdılar. Sirli tibet cəmiyyəti “Yaşıl rahiblər” “Tule” cəmiyyəti ilə əlaqə yaratmışdı.

Berlində yaşayan lama “Yaşıl rahiblər”ə məxsus olduğunu bildirmək üçün yaşıl rəngli əlcək taxırdı. Bu lama bir neçə dəfə alman parlamentində keçirilən seçkilərin nəticələrini əvvəlcədən proqnozlaşdırmışdı.

Reyxin paytaxtına sovet orduları tərəfindən təşkil edilən hücum zamanı Hitlerə yaxın olan tibetlilər həlak oldular. Onlar əsir düşmək istəmirdilər. Bu səbəbdən ya qanlı döyüşdə öldülər, ya da sui-qəsd etdilər. Tibetlilər ölümləri ilə Hitlerin şərq sirlərini də özləri ilə apardılar.

Hikmət
Ölkə.Az