Madriddə Fidel Kastro tərəfdarları və əleyhdarları arasında toqquşma olub

İspaniyanın Madrid şəhərində Kuba səfirliyi önündə eyni anda iki nümayiş keçirilir.

Ölkə.Az xəbər verir ki, bu gün səhər saatlarında vəfat etmiş Kuba lideri Fidel Kastronun tərəfdarları və əleyhdarları Madriddə fəaliyyət göstərən Kuba səfirliyinin ətrafına toplaşıblar.

Aksiya iştirakçıları arasında toqquşma yaşanıb. Kasto tərəfdarları səfirlik binasına gələrək liderin ölümünə görə başsağlığı vermək istəyiblər. Digər aksiya isə Kubada demokratiyanın qurulmasını dəstəkləyən "Kuba, artıq demokratiya lazımdır" platforması tərəfindən keçirilir.

Bir-birini təhqir edən tərəflər əlbayaxa dalaşmağa başlayıblar. Polis əməkdaşları müdaxilə etmək məcburiyyətində qalıblar. Verilən xəbərə görə, xəsarət alan yoxdur.

Qeyd edək ki, İspaniyada 120 min kubalı yaşayır.

Hikmət
Ölkə.Az