2 uşaq anası dəm qazından öldü
Şəkidə 31 yaşlı qadın dəm qazından zəhərlənərək ölüb.
Ölkə.Az ARB TV-yə istinadən xəbər verir ki, hadisə bu gecə saat 4 radələrində Şəki şəhəri, Səlahəddin Kazımov küçəsi, ev 12 ünvanında baş verib.
1987-ci il təvəllüdlü Arzu Aydın qızı Əliməmmədova yaşadığı evin vanna otağında huşsuz vəziyyətdə qayınanası tərəfindən aşkar edilib. Hadisə yerinə çağırılmış həkimlərin müayinəsi zamanı iki uşaq anası olan Arzu Əliməmmədovanın hamam otağında paltar yuyarkən dəm qazından zəhərləndiyi məlum olub.
Mərhumun qayınanası Şahilə Ədilova hadisəylə bağlı bunları deyib: “İşdən gəlib uşaqlarını öpüb qucaqladı. Dedi ki, qoy, uşaqlarımdan doyum. Səbəbin soruşanda cavab verdi ki, işdə oluram deyə uşaqlarımı görmürəm. Qayınana-gəlin söhbət etdik. Sonra mən uzandım. Oyanan da gördüm ki, hamamında işığı yanır, həyətində. Hamam tərəfdən səs gəlmədi. Hamama qaçdım ki, üzü üstə yıxılıb”.
