Orqanizmi qışa hazırlayan qidalar
Payız müxtəlif meyvə və tərəvəzlərin fəslidir. Qızıl fəsildə düzgün qidalanmaq lazımdır ki, orqanizm topladığı vitaminlərlə qışa hazırlaşsın.
Ölkə.Az bu məsələdə lazım olan ərzaqların siyahısını təqdim edir.
1. Sarımsaq
Payız fəslində sarımsaq yaya nisbətən daha faydalıdır. Onun tərkibində efir yağı, boy artımı və görmə qabiliyyətinə müsbət təsir edən vitaminlər var. Sarımsaq qurda və soyuqdəyməyə qarşı əla vasitədir. Əgər payız və qış aylarında bir diş sarımsaq qəbul etsəniz, orqanizmin soyuqdəymə və infeksiya əleyhinə müqaviməti və immuniteti möhkəmlənəcək.
2. Kərəviz
Kərəvizin tərkibində olan maddələr təbiətdə başqa heç bir tərəvəzin tərkibində yoxdur. Bir çoxları onu hətta jenşenlə müqayisə edir. Kərəviz ilk növbədə artıq çəki ilə mübarizə aparan insanlar üçün faydalıdır. Tərkibində kalori miqdarı həddən artıq az olduğu üçün kərəviz istifadə edən orqanizm demək olar ki, kalori qəbul etmir. Xüsusən sinir sistemi üçün faydalıdır. Çünki payız aylarında əsəb sistemində gərilmələr, depressiya və stress artır. Qanın tərkibində kolesterin miqdarını azaldır, ürək və damar sisteminin fəaliyyətini yaxşılaşdırır. Eyni zamanda orqanizmin serotonin ifrazını artırır.
3. Balqabaq
Tərkibində çoxsaylı faydalı maddə olan payız tərəvəzlərindən sayılır. Tərkibində olan karotinin miqdarı göz və ürək-damar sistemi xəstəliyindən əziyyət çəkənlər üçün faydalıdır. Balqabağın tərkibində C, B1, E, B2, PP vitaminləri, kalium, maqnezium, dəmir, sink, kobalt, ftor və sellüloz var.
Balqabaq qurda qarşı da əla vasitədir.
4. Kələm
Kələm ən vacib tərəvəzlərdən sayılır. Onun tərkibinə çoxsaylı faydalı maddələr və payız vitaminləri daxildir. Alimlər bu yaxınlarda kələmin tərkibində U vitamini kəşf ediblər. U vitamini mədə xorası, mədə yarası, onikibarmaq bağırsağın müalicəsində çox faydalıdır. Eyni zamanda kələmin tərkibində olan C, B1, B2, PP vitaminləri iltihab əleyhinə faydalıdır və ağrıkəsici kimi də təsiri var. Kələm damarları möhkəmləndirir, ürəyin işemiya xəstəliyi və böyrək xəstəliklərinə qarşı faydalıdır.
5. Qırmızı kələm
Ağ kələmlə eyni sinfə aiddir. Kimyəvi tərkibinə görə fərqlənir. Qırmızı kələmin tərkibində C vitaminin miqdarı çoxdur. Həkim və dietoloqlar mədə xəstəliyindən əziyyət çəkənlərə qırmızı kələmi məsləhət görür. Qırmızı kələm qan damarlarının divarını möhkəmləndirir və onları elastik edir.
6. Kəvər
Kəvər sidikqovucu xüsusiyyətə malikdir. Piylənmə, podaqra, fiziki və psixi yorğunluqdan əziyyət çəkənlərə məsləhət görülür. Kəvər iştahı artırır və qara ciyərin fəaliyyətini yaxşılaşdırır.
7. Yerkökü
Həm uşaqlar, həm böyüklər üçün faydalıdır. Tərkibində olan beta-karotin görmə qabiliyyətinə müsbət təsir edir. Eyni zamanda yerkökünün tərkibində olan A vitamini toyuq korluğu və göz xəstəliyindən müalicədə faydalıdır. A vitaminindən başqa bu tərəvəzin tərkibində B vitamini, nikotin turşusu, maqnezium, fosfor və D vitamini var. Yerkökü ödqovucu, bəlğəmgətirici təsirə malikdir.
8. Çuğundur
Orqanizmdə qanı artırır. Tərkibində C vitamininin miqdarı çoxdur. Eyni zamanda yod, maqnezium dəmir və kalsium da var. Çuğundur mədə və qara ciyərdən toksinləri çıxarır. Anemiya, qan xəstəlikləri, hipotoniya və qanın laxtalanması zamanı məsləhət görülür. Qalxanvari vəz üçün çox faydalıdır.
Təbii ki, payız aylarında qəbul edilməli olan meyvə və tərəvəzlərin siyahısı bununla bitmir. Eyni zamanda alma, armud, xurma, quşarmudu, quşüzümü və s. meyvələrdən istifadə etmək məsləhət görülür.
Hikmət
Ölkə.Az
