Rusiyadan təklif

Rusiya mətbuatı Azərbaycanın Suriyadakı əməliyyatlara qoşula biləcəyi ilə bağlı xəbər yayıb.

İddia edilirdi ki, Rusiya-Suriya probleminin həlli üçün koalisiya yaradır. Koalisiyaya İran, Çin, Serbiya, Azərbaycan və Ermənistan da daxil ediləcək. MDB Müdafiə nazirlərinin şurasının sammitində isə bu məsələ müzakirə edilməyib.

Bu iddia ilə bağlı hərbi ekspert Üzeyir Cəfərov Ölkə.Az-a açıqlama verib:

"Dünən Moskvada keçirilən MDB Müdafiə nazirlərinin şurasının toplantısından əvvəl Azərbaycanın da Suriyadakı əməliyyatlara qoşulacağı barədə məlumat "Nezavisimaya" qəzeti tərəfindən ictimailəşdirildi. Azərbaycanın müdafiə naziri Rusiyalı həmkarı Sergey Şoyqu ilə görüşündə bəzi məsələlər müzakirə mövzusu oldu. Görüş ərəfəsində Rusiya tərəfi Azərbaycan tərəfini yoxlamaq üçün "Azərbaycan silahlı qüvvələrinnin nümayəndələri Suriyada minadan təmizləmə əməliyyatlarında iştirak edəcəklər" fikrini ortaya atdı.

Əslinə qalsa bu sırf Azərbaycan Ərazilərin Minadan Təmizlənməsi üzrə Milli Agentliyinin funksiyalarına daxil olan bir məsələdir. Azərbaycan Müdafiə Nazirliyinin özünün mühəndis istehkam qoşunları var və onlar heç bir zaman ölkə xaricinə əməliyyatlara göndərilməyiblər. Kosovoda, İraqda, indi isə Əfqanıstanda 94 nəfərlik şəxsi heyyətimiz post-patrul xidməti ilə məşğuldur. Ona görə də, Azərbaycan Müdafiə Nazirliyinin tabeliyində olan əsgərlərin birdən-birə Suriyaya, yəni başqa sözlə desək cəhənnəm oduna göndərilməsinə nə müdafiə nazirliyinin rəhbərliyi, nə nazirin özü, nə də ölkə başçısı icazə verməz. Rusiya mətbuatının ortaya atdığı bu məsələ sadəcə Azərbaycanın ictimai fikrini öyrənmək üçün idi. İki ölkə arasında imzalanan sənədlər isə 2017-ci il üçün birgə fəaliyyət planıdır. O cümlədən hərbi dəniz qüvvələri arasında oyunların keçirilməsi də nəzərdə tutulub.

"Nezavisimaya" kimi ciddi bir qəzetin belə qeyri-ciddi məlumatı ictimailəşdirməsi əsla yolverilməzdir. Dünən Rusiyanın müdafiə naziri Sergey Şoyqu Azərbaycanlı həmkarına "Azərbaycan Xəzərdə sabitliyin for-postudur" deməsi, Ermənistana verilən "İsgəndər" raketləri və Ermənistan və Rusiya arasında birləşmiş qoşunların yaradılmasına görə üzrxahlıq kimi qəbul olunmalıdır".

Səxavət Məmməd
Ölkə.Az