Razi Nurullayev: “Böyük məbləğlər gizlədilib, talan edilib və şişirdilərək mənimsənilib”
"Hər gün MTN və İnformasiya və Kommunikasiya Texnologiyaları Nazirliyinin məhkəmə proseslərində milyonlarla büdcə vəsaitinin dədə malı kimi şəxsi məqsədlər üçün istifadə olunması haqqında məlumatları və şahid ifadələrini oxuyur və dinləyirik. Yalnız bir nazirlikdə yüz milyonlarla vəsaitin talanmasından söhbət gedir. Bu isə aysberqin görünən tərəfidir. Daha böyük məbləğlər gizlədilib, talan edilib və şişirdilərək mənimsənilib".
Ölkə.Az xəbər verir ki, bunu Azərbaycan Xalq Cəbhəsi Partiyasının sədri Razi Nurullayev deyib. Sədr bildirib ki, sadə riyazi hesablamalar aparsaq, qorxunc rəqəmlərlə üzləşə bilərik:
"Azərbaycanın Nazirlər Kabinetinin strukturuna 20 nazirlik, 10 dövlət komitəsi, 2 dövlət administrasiyası, 6 dövlət xidməti və 8-10 arası dövlət agentliyi, mərkəzlər və digər dövlət strukturları daxildir. 20 nazirliyin hərəsi orta hesabla 70 milyon oğurlasa, 1,4 milyard manat edir. 10 dövlət komitəsi də orta hesabla 40 milyon oğurlasa 400 milyon manat, agentliklər və digər strukturlarda da toplam 300 milyon oğurluq etdiyini düşünək. İcra hakimiyyətləri ildə ən azı 2-5 milyon manat oğurlasa bu da orta hesabla 200 milyon manat edir. Oğurlanmış vəsaitlərin cəmi gəlib 2,3 milyarda çıxır.
Bu mənim ən sadəlövh və sadə hesablamamdır. Çünki, yerli səviyyələrdə də - hər kəs çəki və səviyyəsində oğurluq edir".
Bu problemə diqqət çəkən AXCP sədri qeyd edib ki, əgər büdcə vəsaitləri təyinatı üzrə və şəffaf xərclənsəydi, ölkədə nəzərdə tutulan inkişaf da gedərdi:
"Banklar quldur və talançı rolunda iştirak etməzdi. Kənd təsərrüfatı inkişaf edər, istehsalat müəssisələri yaradılar, fabrik və zavodlar açılardı. Hər kəsin başı talamağa qarışdı, biri durub həyacan təbili çalmadı ki, neft qumar kimi bir şeydir. Bir gün neft yerinə qrunt suyu çıxar və sairə.
İlkin mərhələdə hakimiyyət komandasının heç olmasa yarısı dəyişməlidir. Kimsə ölkənin ağır vəziyyətə düşməsinə görə cavab verməlidir. Növbəti seçkilər 2018-ci ildə keçiriləcək və hakimiyyət dəyişikliyi üçün hər şeyi edəcəyik. Ona qədər isə hakimiyyət özündə güc tapıb vacib islahatlara getməlidir. Birinci islahat elə dövlət qulluqçusu adı altında gizlənib dövlət büdcəsi - yəni xalqın pulu ilə özünə biznes quranlar, qara və çirkli pulları yuyan natəmizlərə kömək edən yüksək çinli məmurların küçəyə atılmasıdır".
