Bağdad daşqından xilas olub

İraqın xüsusi xidmət qüvvələri İŞİD-in növbəti təxribatının qarşısını alıblar.

Ölkə.Az Iraqi News-a istinadən xəbər verir ki, İraqın xüsusi xidmət qüvvələri İŞİD-in Bağdadı daşqına məruz qoymasının qarşısını almağa müvəffəq olublar.

Operativ şöbənin rəisi Abdulla əl-Şammarinin bildirdiyinə görə, İŞİD -in terrorçuları suyun Bağdada axmasını təmin etmək üçün Səmərrə şəhərində yerləşən bəndi dağıtmaa cəhd göstəriblər:

"İŞİD döyüşçüləri Səmərrə şəhərində yerləşən bəndi dağıtmağı planlaşdırırdılar. Bizim qüvvələrimiz onların arzusunu ürəyində qoydu. Bağdadda aparılan əməliyyat nəticəsində İŞİD hərbi birləşmələri darmadağın edilib və Ramadiyə yol açılıb", - deyə, rəis bildirib.

Mənbələrin yaydığı məlumata əsasən, hal-hazırda Səmərrə şəhərində İŞİD və İraq hərbçiləri arasında qızğın döyüşlər davam edir. Qeyd edək ki, Səmərrə şəhəri İraqın ən qədim şəhərlərindən biridir və paytaxt Bağdaddan 120 km şimalda yerləşir.

Rəşid Mustafazadə

Ölkə.Az