Çavuşoğlu: "Azərbaycan xalqının dəstəyini heç vaxt unutmarıq"
Bakıda rəsmi səfərdə olan Türkiyənin xarici işlər naziri Movlud Çavuşoğlu azərbaycanlı həmkarı Elmar Məmmədyarovla görüşüb.
Ölkə.Az xəbər verir ki, heyətlərin görüşündən sonra mətbuat konfransı təşkil edilib. Çıxış edən Çavuşoğlu Türkiyənin hər məsələdə Azərbaycanın yanında olduğunu vurğulayıb:
"Çətin anlarda nə bizim gözümüzə, nə də Azərbaycan xalqının gözünə yuxu getmədi".
Nazir rəsmi Bakıya son səfərinin Türkiyədəki hərbi çevriliş cəhdindən əvvəl olduğunu xatırladıb:
"15 iyul tarixində Azərbaycanda rəsmi səfərdə idim. O gün Türkiyəyə geri qayıdanda hərbi çevriliş baş verdi və bu prossesdə biz günlərlə yuxu yatmadıq. Eləcə də Azərbaycan da yuxuya getmədi, bizlə birlikdə keşikdə durdu. FETÖ ilə mübarizədə Azərbaycan öz dəstəyini hər zaman göstərib".
Nazir Bakıya səfərdən məmnun olduğunu vurğulayaraq, Azərbaycanda iqtisadi proqramların Türkiyə tərəfindən güclü bir formada dəstəkləndiyini bildirib. Nazir türk iş adamlarının Azərbaycana sərmayə yatırmasının, qarşılıqlı ticarətin inkişaf etdirilməsinin və ticarətə mane olan problemlərin birdəfəlik həll edilməsinin vacibliyini bildirib.
Çavuşoğlu Bakı-Tiflis-Qars dəmiryolu layihəsinin vacibliyindən və iki dövlətin müştərək həyata keçirdiyi energetika sahəsindəki layihələrdən bəs edərək TANAP-ın Türkiyə üçün çox vacib olduğunu qeyd edib.
Azərbaycanlı həmkarı Elmar Məmmədyarovla söhbət zamanı Dağlıq Qarabağ probleminə toxunan Çavuşoğlu deyib:
"Dağlıq Qarabağ probleminin həlli üçün üçüncü ölkələr və Rusiya ilə aparılan danışıqlara dair fikir mübadiləsi apardıq. Rusiya xarici işlər naziri Sergey Lavrovla Antalyada baş tutan görüşdə də bu məsələyə dair fikir mübadiləsi oldu. Biz görüşdə məsələnin Azərbaycanın ərazi bütövlüyü çərçivəsində həll edilməli olduğunu bildirdik. Son dövrlər məsələnin həllində gerilik hiss edilir. Amma Rusiyanın son vaxtlar atdığı addımları dəstəkləyirik. Ermənistan işğal etdiyi Azərbaycan torpaqlarını tərk etməlidir. Qardaş ölkə olaraq hər cür dəstəyə hazırıq".
Hikmət
