Deputat ev üçün Artur Rəsizadəyə müraciət etdi

Milli Məclisin bu gün keçirilən plenar iclasında millət vəkili Bəxtiyar Əliyev deputatlar üçün tikilməsi nəzərdə tutulan evlərə ayrılan milyonların hara xərclənməsini öyrənmək üçün Baş nazir Artur Rəsizadəyə müraciət edib.

Ölkə.Az-ın məlumatına görə, B.Əliyev sözügedən vəsaitin hara xərclənməsindən deputatların məlumatsız olduğunu bildirib:

“Yəqin xatırlayırsınız ki, vaxtı ilə deputatlar və digər kateqoriyadan olan insanlar üçün mənzillər tikilirdi. Baş nazir Artur Rəsizadənin 2006-cı ildə verdiyi sərəncamında konpensasiya verilmək şərti ilə yüksək məbləğdə dövlət vəsaiti hesabına deputatlar üçün binaların tikilməsi nəzərdə tutulmuşdu. Üstündən 10 il keçib və dövlət büdcəsindən milyonlarla vəsait o şirkətlərə ayrılıb. Amma 10 il keçməsinə baxmayaraq o şirkət hələ də bu mənzilləri tikib insanlara təhvil verməyib. Ona görə də mən Baş nazirə burada müraciət edirəm: Cənab Baş nazir, sizin sərəncamınızla ayrılmış o milyonlar 10 il keçməsinə baxmayaraq, həmin insanlara verilməyib. Siz bu məsələnin araşdırılmasına göstəriş verin. Çünki o insanların bu mənzillərə ehtiyacları var və o insanlar bu evləri öz vəsaitləri hesabına tikdirirdilər. Nədənsə bu məsələ bu günə qədər öz həllini hələ də tapa bilmir”.

Spiker Oqtay Əsədov isə Bəxtiyar Əliyevə cavab verib:

“Bəxtiyar müəllim, siz 2002-ci ildə deputat üçün tikilən mənzillərdən danışırsınız? Orada növbədə olan deputatların 80 faizi ya pullarını, ya da mənzillərini alıblar. İndi də binanı başa çatdırırlar. Bina başa çatan kimi, kimin ki orada mənzili varsa, onu da alacaqlar. Orada heç bir problem olmayıb”.

Zaur Əziz
Ölkə.Az