Siyavuş Novruzov Qüdrət Həsənquliyevə cavab verdi

Milli Məclisin bu gün keçirilən plenar iclasında çıxış edən parlamentin İctimai birliklər və dini qurumlar komitəsinin sədri, Yeni Azərbaycan Partiyası (YAP) icra katibinin müavini Siyavuş Novruzov Bütöv Azərbaycan Xalq Cəbhəsi Partiyasının sədri, deputat Qüdrət Həsənquliyevə cavab verib.

Ölkə.Az-ın məlumatına görə, YAP-çı deputat Qüdrət Həsənquliyevin adını çəkərək bildirib ki, tənqidin və təklifin fəlsəfəsinə baxsaq, hər hansı məsələ müzakirə olunanda müxalifət tənqid, iqtidar isə müdafiə etməlidir:

“İqtidar təmsilçiləri hökumətin nümayəndəsidir və onun mövqeyini dəstəkləməlidir. Amma tənqidin də forması olmalıdır. Məsələn, hökuməti tənqid edirsiz, lakin burada əmək və əhalisinin sosial müdafiə naziri Səlim Müslümovu müdafiə edirsiz. Nəzər alaq ki, Səlim Müslümov da hökumətin üzvüdür. Bu baxımdan tənqid etdikdə konkret sahəni tənqid etmək lazımdır. Ümumi qaydada fikir söyləməyə ehtiyac yoxdur. Ümumi fikir deyiləndə mətbuatda qeyd olunur ki, hökumət tənqid edildi. Belə olan halda, hər kəs düşünür ki, bu tənqidin ona aiddiyatı yoxdur və yaxud bəzi həmkarlarımız çıxanda hökumət üzvlərinə bildirir ki, mən səni nəzərdə tutmurdum. Ona görə də söz konktret ünvana deyilməli və həmin şəxs tənqid edilməlidir ki, işindən nəticə çıxarsın. Bu gün hər kəs Dövlət Sosial Müdafiə Fondu, kənd tərəssürfatı və ya digər sahələrlə bağlı fikirlərini konkret səsləndirməlidir. Çünki hökumətin həm yaxşı, həm də pis işləyən üzvü var. Pis işləyən üzvün adını çəkin və münasibətlərinizi də o cür qurun”.

S.Novruzov qeyd edib ki, Əmək və Əhalinin Sosial Müdafiəsi Nazirliyi yanında Dövlət Sosial Müdafiə Fondu tərəfindən həm pensiyaların hesablanması, həm ünvanlı sosial yardımların verilməsi ilə bağlı böyük islahatlar həyata keçirilib:

“Əvvəllər ünvanlı sosial yarıdm alanlarla bağlı siyahı ortaya çıxmırdı, lakin bu məsələlərin elektronlaşması istənilən şəxsə bu siyahını əldə etmək imkanı yaradıb. Büdcə müzakirələri zamanı sosial sahə ilə bağlı kifayət qədər fikirlərimizi səsləndirmişik və bütün sahələrdən fərqli olaraq sosial sahədə artımlar göz qabağındadır. Hər birimiz əlillərin mənzil şəraitinin yaxşılaşdırılması və yeni mənzillərin tikilməsinin şahidiyik. Bu baxımdan qanun layihəsini dəstəkləyir və həmkarlarımı bu layihəyə səs verməyə çağırıram”.

Zaur Əziz
Ölkə.Az