Azərbaycan Respublikasının Prezidenti yanında Gənclər Fondu fəaliyyətinin 5 illiyi ilə bağlı keçirdiyi silsilə tədbirlərə start verdi
İlk görüş 8 Dekabr 2016-cı il tarixində Sumqayıt şəhər Heydər Əliyev Mərkəzində keçirilmişdir. Tədbirdə Azərbaycan Respublikasının Prezidenti yanında Gənclər Fondunun, Sumqayıt şəhər İcra Hakimiyyətinin, Sumqayıt, Xızı, Siyəzən, Xırdalan, Abşeron, Şabran, Qobustan, Şamaxı, Quba, Qusar, Qubadlı və Xaçmaz şəhər Gənclər və İdman Baş İdarələrinin nüməyəndələri, Gənclər Təşkilatlarının üzvləri və gənclər iştirak etmişlər.
Tədbirdə giriş sözü ilə Azərbaycan Respublikasının Prezidenti yanında Gənclər Fondunun icraçı direktoru Fərhad Hacıyev və Sumqayıt şəhər İcra Hakimiyyətinin başçısının müavini Teymur Səmədov çıxış etmişdir. T.Səmədov ölkədə həyata keçirilən gənclər siyasətinin uğurlarından bəhs edərək Gənclər Fondunu dövlət gənclər siyasətinin aparıcı dəstəkçi qüvvələrindən olduğunu vurğulamışdır.
Növbəti çıxışda Fərhad Hacıyev əsası Ulu Öndər Heydər Əliyev tərəfindən qoyulmuş, hal-hazırda prezident İlham Əliyev tərəfindən uğurla həyata keçirilən dövlət gənclər siyasətindən danışmışdır. Cənab prezidentin gənclərə olan diqqət və qayğısının bariz nümunəsi kimi Azərbaycan prezidenti cənab İlham Əliyevin 19 dekabr 2011-ci il tarixli, 542 saylı fərmanı ilə Gənclər Fondunun yaradılması vurğulanmışdır.
Daha sonra Fərhad Hacıyev dəvət edilən 11 rayonun gənclərini salamlayaraq Fondun bu günə qədər həyata keçirdiyi qrant müsabiqələrdə yaxından fəal iştirak etdikləri üçün təşəkkürünü bildirmiş və layihələrin uğurlu icrasında region gənclərinin xidmətini xüsusi vurğulamışdır.
Tədbir Fondun Strateji planlaşdırma və beynəlxalq əlaqələr sektorunun müdiri Vüsalə Niftəliyevanın çıxışı ilə davam etmişdir. V.Niftəliyeva Fondun təqdimatını tədbir iştirakçılarının nəzərinə çatdırmış və qeyd etmişdir ki, fəaliyyətə başladığı vaxtdan bu günə qədər Gənclər Fonduna 7098 layihə daxil olmuş, onların 3341-i dəstəklənmişdir. Eyni zamanda səfər qrantları ilə bağlı 384 müraciətin 267-nə müsbət cavab verilmişdir.
Tədbirdə Demokratik Gənclər İctimai Birliyinin sədri Ramil Süleymanov və Sumqayıt Asan Xidmət Mərkəzinin könüllüsü Nigar Qocayeva çıxış etmişlər.
Tədbirin qedişatında yığıncaqda iştirak edən fəal gənc layihə rəhbərləri söz alaraq Gənclər Fonduna təşəkkürlərini bildirmişlər.
