Əli Mirəliyevdən Hadisəni 375 minə Bakıya gətirənlərə

Tanınmış müğənni Əli Mirəliyev Bakı Olimpiya Stadionunda Dünya Azərbaycanlıların Həmrəyliyi Gününə həsr olunmuş konsertdə türkiyəli ulduz sənətçilərin yüksək qonorar müqabilində çıxış etməsinə münasibət bildirib.

Müğənni Ölkə.Az-a açıqlamasında sözügedən sənətçiləri ölkəmizə dəvət edənləri sərt tənqid edib:

"Bineyi-qədimdən azərbaycanlılar özlərinə qiymət verməyiblər. Həmişə qıraqdan gələnə hər şey ediblər. Amma evin içində oxuyana, şairə, mühəndisə, həkimə yuxarıdan aşağı baxıblar. Baxın, xarici firmalarda işləyənlər əlli min, bizimkilər beş yüz manat maaş alırlar. Bax, Manana pis-yaxşı oxuyur da. Amma əsli Gürcüstandandır, Azərbaycanın əməkdar artistidir. Gürcüstanda fəxri adı olan azərbaycanlı varmı? İrəvandan gələnlərə də o vaxt fəxri adlar verirdik. Əvvəldən bizim azərbaycanlılar yalaq, yaltaq, işi bilməyən, bilənə də imkan verməyən olublar. Kimdir bunu edən? Mədəniyyət naziri belə görür də. Camaatın maaşı yox, ətin kilosu on manat... Bu pulu özümüzünkülərə verin də, özgəyə niyə verirsiniz? Büdcədə pul yoxdur ki, təqaüdümüzü alaq. Çox gülməlidir e. Bir neçə il əvvəl hansısa ölkəyə bir neçə milyon pul kömək elədik. Bu pulu millətinə ver də, çörək qalxır, qaz, işıq qalxır. Siz bununla nə demək istəyirsiniz? Türkiyə elə həmişə bizim ayağımızı dartıb da. Türk 1990-cı ilin 20 yanvarında bizə kömək elədimi? Qırıldıq, kömək etmədilər".

Ə.Mirəliyev türkiyəli ifaçıların sənəti barədə də danışıb:

"Türkün oxumağı da yoxdur. Onlar yunan mahnılarını oğurlayıb adlarını türkcə qoyurlar. Bizim öz bəstəkarlarımız var. Eldar Mansurov, Tahir Əkbər, Faiq Sücəddinov, Cavanşir Quliyev, Gövhər Həsənzadə, Nailə Mirməmmədli, Aygün Səmədzadə... Xeyir ola başqa yerdən çağırırsınız? Bizim musiqimiz başsız qalıb. Mədəniyyətimizin başında duran şəxslər ancaq reklama işləyirlər ki, xarici ölkədə təriflənsinlər. Bax bu da fakt. Yeni il keçirilir, türkləri çağırırlar. Yoxdur bizim oxuyanlarımız? Ona görə bizim torpaqlar da işğalda qalacaq, özümüz də pis vəziyyətdə yaşayacağıq".

Xatırladaq ki, Türkiyə mətbuatı yeni il gecəsi çıxışa görə Hadisənin 2 saata 190 min manat (375 min TL), Demet Akalının 1 saata 127 min manat qonorar alacağını yazıb.

İntiqam VALEHOĞLU
Ölkə.Az