Boliviyada fövqəladə vəziyyət: quraqlıq

Boliviya hökuməti ölkədə son 25 il ərzində müşahidə edilən ən şiddətli quraqlıq səbəbindən fövqəladə vəziyyət rejimi elan edib.

Ölkə.Az xəbər verir ki, belə böhran şəraitində əksər sakin ciddi su çatışmazlığı ilə üzləşib. Adamlar düşünür ki, quraqlığın yaranması Çilinin dağ-mədən şirkətlərinin fəaliyyəti ilə əlaqədardır. Onların sözlərinə görə, bu şirkətlərin fəaliyyəti su balansının pozulmasına gətirib çıxarıb. Quraqlıq Boliviyanın iri şəhərlərində etiraz aksiyalarının keçirilməsi ilə nəticələnib.

Ən qorxulu vəziyyət kənd təsərrüfatı sahəsində qeydə alınıb. İyundan noyabra qədər 125 000-dən çox ailə yardım üçün müraciət edib. Quraqlıq 290 000 hektar əkin sahəsi və 360 000 baş iri buynuzlu mal-qara üçün təhlükə törədib. Hökumət quraqlıqdan ən çox ziyan çəkmiş regionlara su sisternlərinin çatdırılması, o cümlədən orada quyuların qazılması üçün təcili tədbirlər həyata keçirir. La-Pas şəhərində ölkə tarixində ilk dəfə olaraq su ehtiyatlarından istifadəyə məhdudiyyət qoyulub. Şəhəri su ilə təmin edən 3 əsas su anbarında səviyyə aşağı düşüb. Mütəxəssislər quraqlığa bir çox amillərin təsir etdiyini bildiriblər. Onların arasında iqlim dəyişikliyi də var. Belə ki, Boliviyada havanın daha da istiləşməsi göl və su anbarlarının qurumasına gətirib çıxarıb. Ötən il ölkənin ən böyük göllərindən biri olan Poopo tamamilə quruyub. İstiləşmə Boliviyada buzlaqların da əriməsinə səbəb ola bilər. Ötən əsrin 70-ci illərindən bu yana onların sahəsi 30-50% azalıb.

Proqnozlara görə, gələcək illərdə buzlaqların bir çoxunun tamamilə yoxolma ehtimalı var. Bu isə böyük problemlərə yol açacaq, çünki buzlaqlar Cənubi Amerikanın əksər dağlıq şəhərlərinin yeganə içməli su mənbəyidir.

Azər Qismət
Ölkə.Az