"ABŞ Türkiyənin gücündən öz məqsədləri üçün istifadə etmək istəyir"

Türkiyə PKK-nı gələn ilin aprel ayından sonra tamamilə məhv edəcəyini bəyan edib.

Buna cavab olaraq isə, ABŞ bildirib ki, Türkiyənin əsas işi İŞİD-i məhv etmək olmalıdır.

İŞİD-ə qarşı qurulmuş Beynəlxalq koalisiyanın rəsmi nümayəndəsi Con Dorrian deyib ki, bizi narahat edən "Fərat qalxanı" əməliyyatı çərçivəsində Türkiyə ordusunun PKK-ya da zərbə endirməsidir. Rəsmi Ankara PKK-nı terrorçu təşkilat hesab edir. Rakka şəhərində kürd birləşmələrindən ibarət 45 minlik ordu İŞİD-ə qarşı vuruşur.

Beynəlxalq koalisiyanın rəsmi nümayəndəsi bu bəyanatı ilə Türkiyəni PKK-ya qarşı keçirəcəyi əməliyyatları dayandırmağa səsləmiş olub.

Türkiyənin PKK planı və ABŞ-ın Türkiyəni PKK-ya qarşı mübarizədən çəkindirmək istəyi barədə politoloq İlqar Vəlizadə Ölkə.Az-a açıqlama verib:

"Türkiyənin məqsədləri var. Bunu şərh etməyə ehtiyac yoxdur. Türkiyənin niyə məhz aprel ayında PKK-nı məhv edəcəyi barədə ciddi addımlar atacağına fikir bildirmək çətindir. Bu cür bəyanatlar üçün Türkiyənin əlində əsasları var.

ABŞ-ın Türkiyəyə verdiyi məsləhətə gəlincə isə, kimsə kiməsə göstəriş verə bilməz. ABŞ və digər dövlətlər birmənalı olaraq Türkiyənin işlərinə qarışmamalıdırlar. Yersiz məsləhətlər vermək əslində ABŞ-ın nüfuzunu aşağı salır. Rəsmi Vaşinqtonun məsələhəti heç kimə lazım deyil, ona heç kim qulaq asmır. Belə məsələhət verməyin mənası da yoxdur.

Bu cür məsləhətlər əslində ABŞ-ın planlarını ifşa edir. Türkiyənin gücünü, əlində olan silahları, insanlarını öz məqsədləri üçün istifadə etmək ABŞ-ın planıdır. Türklər də başa düşür ki, bu siyasətin sonu yoxdur. Hadisələr, tarix göstərir ki, hər hansısa başqa qüvvənin sifarişini yerinə yetirmək sifarişçinin alətinə çevrilmək deməkdir. İnanmıram ki, ABŞ-ın məsələhəti Türkiyəni qane etsin".

Səxavət Məmməd
Ölkə.Az