Hərbi ekspert Tükiyənin PKK-ya qarşı planlaşdırdığı əməliyyatları Azərbaycanın aprel döyüşləri ilə müqayisə etdi

Türkiyə aprel ayında PKK-nı məhv edəcəyini bəyan etdi.

Türkiyənin daxili işlər naziri Süleyman Soylu bildirib ki, PKK-nın apreldən sonra başlarına nə gələcəyindən xəbərləri yoxdur. Yox olmaq təhlükəsi ilə üz-üzə qalacaqlar.

Bundan əlavə, türkiyəli nazir bəyan edib ki, prezidentdən tutmuş sərhəddə xidmət aparan əsgərlərimizə qədər hamı qərarlıdır. Bu gün PKK yaxşı günlərini yaşayır. Apreldən sonra başlarına nə gələcəyindən xəbərləri yoxdur. Qış aylarında da mübarizəyə davam edəcəyik. Bütün işləri planlaşdırmışıq. Bu planlar çərçivəsində terrorçulara qış aylarında da rahatlıq verməyəcəyik. Gizləndikləri yer, mağara sığınacaq qalmayacaq. Bingöldə 53 sığınacaq məhv etmişik. Vətəndaşları, ticarətlə məşğul olanları soyub demokratiyadan danışmaq olmaz.

Türkiyənin planlaşdırdığı PKK əməliyyatları barədə hərbi ekspert Üzeyir Cəfərov Ölkə.Az-a danışıb:

"Türkiyənin daxili işlər naziri Süleyman Soylunun açıqlamasını anlaya bilmirəm. Türkiyə kimi ciddi bir dövlət belə məsələlərdə adətən işi görüb sonra elan etməli idi. Türkiyə "Fərat qalxanı" əməliyyatı çərçivəsində xüsusi təyinatlıları Suriyaya göndərib və hərbi dillə desək xüsusi təyinatlılar orada "işləyirlər". Düşünmürəm ki, aprel ayında çox böyük uğur əldə olunacaq.

Son zamanlar Türkiyə PKK və İŞİD-dən daha çox Rusiya ilə münasibətləri qaydaya qoymaq barədə düşünür. Hətta üçtərəfli Ankara, Bakı, Moskva parlament qrupu yaradırlar. Türkiyə Rusiyanın şirin vədlərinə inanır və region üçün önəmli məsələləri diqqətdən qaçırır. Suriya ilə bağlı məsələdə də ola bilsin ki, tərəflər arasında müəyyən gərginlik yaşansın.

Türkiyə 5 aydır ki, "Fərat qalxanı" əməliyyatı keçirir. 5 ay ərzində Türkiyə xeyli sayda itki verib, ancaq ortada konkret nəticə yoxdur. Türkiyə əməliyyatlara başlayır, sonradan əməliyyatlar dayandırılır. Əməliyyatlar dayananda isə terrorçular yenidən güc toplayırlar.

İŞİD və PKK çox zəifləyib, ancaq onların sıradan çıxdığını düşünmək olmaz. Aprel ayında PKK-nın Türk ordusu tərəfindən tam məhv ediləcəyi real görünmür, ancaq 2017-ci il ərzində Türkiyə məqsədinə nail ola bilər. Rəsmi Ankara son dərəcə ehtiyatlı olmalıdır.

Türkiyə istiqaməti əvvəlcədən göstərir, bu isə PKK-nın hazırlıqlara başlamasına kömək edəcək. Aprel ayında Qarabağ cəbhəsində ermənilər Azərbaycan ordusunun güclü zərbə endirəcəyini gözləmirdilər. Döyüşlərdən sonra ermənilər və Rusiya oyandı və Ermənistanı silahlandırmağa başladılar. Türkiyənin belə bir dəqiq tarix verməsi terrorçulara və havadarlarına hazırlıq görməyə imkan yaradacaq. Yazını oxuyub kimsə deyəcək ki, o boyda siyasətçilər guya nə danışdıqlarını bilmir, amma Azərbaycanda hansısa ekspert oturub rəsmi Ankaranın bəyanatında səhv tutur. Ancaq hesab edirəm ki, bəzən dövlət, hökumət adamları da uşaq səhvlərinə yol verə bilirlər".

Səxavət Məmməd
Ölkə.Az