Göyçayda 9-cu Nar Bayramı

"Nar Bayramı Göyçayı dünyaya tanıdır"

Ölkə.Az xəbər verir ki, bu sözləri Göyçay rayon İcra hakimi bu gün keçirilən Nar Bayramında çıxış edərkən deyib. Mənsum Məmmədov həmçinin bildirib ki, artıq 9-cu dəfə keçirilən Nar Bayramının sayəsində Göyçay və Göyçay narı dünyaya inteqrasiya edir:

"2005-ci ildən keçirilən bu bayrama hər il müxtəlif ölkələrdən rəsmi nümayəndələr, turistlər və media işçiləri qatılır. Ötən il rayondan ümumilikdə 26 min tondan artıq məhsul hasil edilmişdi. Bu il bu rəqəmin 50 min tonu keçməsi planlaşdırılıb".

Tədbirdə Milli Məclisin deputatları Zahid Oruc, Eldar İbrahimov, Şəmsəddin Hacıyev, Belarusiya və İtaliyanın ölkəmizdəki səfirləri və digər rəsmilər iştirak edib. Zahid Oruc öz növbəsində bildirib ki, bu cür tədbirlərin keçirilməsi rayonların sosial-iqtisadi inkişafının göstəricisidir.

Rəsmi hissədən sonra qonaqlar yerli sakinlərin hazırladıqları süfrələrlə tanış olub, müxtəlif yeməklərdən, nar və nardan hazırlanan təamlardan dadıblar. Tədbir axşam saatlarında konsert proqramıyla davam edib.

Tədbirdə bir sıra xarici ölkə səfirləri, habelə respublikadan kənarda yaşayan göyçaylı iş adamları da iştirak edirdilər. Tədbir iştirakçıları şəhərin mərkəzi meydanında nar məhsullarından hazırlanmış şirələrə qonaq ediliblər.

Xatırladaq ki, "Nar bayramı" ilk dəfə Azərbaycan Respublikası Mədəniyyət və Turizm Nazirliyi və Göyçay rayon İcra Hakimiyyətinin birgə təşəbbüsü ilə 3 noyabr 2006-cı ildə keçirilib.

Nar bayramında Göyçay rayonun ayrı-ayrı kəndlərində yetişən nar növləri və onlardan hazırlanmış məhsullar rayon mərkəzinə gətirilir və şəhər meydanında təşkil olunmuş sərgidə nümayiş etdirilir. Şəhər mərkəzində gənc idmançıların çıxışları və konsert proqramlarına tamaşa edilir. Bayramların keçirilməsində əsas məqsəd regionların təbliği, mədəni və iqtisadi potensialın nümayişi və turizmin inkişaf etdirilməsindən ibarətdir.

Nar Bayramından olan fotoreportajı sizərə təqdim edirik: