Putin: "Trampın rəsmən işə başlamağını gözləyirəm"

Rusiya prezidentinin fikrinə görə, Rusiya və ABŞ-ın dərin, fundamental maraqları iki ölkə arasında münasibətlərin normallaşmasını tələb edir.

Ölkə.Az xəbər verir ki, Rusiya prezidenti Yaponiyada yerli telekanallara verdiyi müsahibədə bu məsələyə toxunub.

Prezident deyib: "Bu illər ərzində rus-amerikan münasibətlərinin inkişafına ehtiyatla və şübhə ilə yanaşan insanların çoxaldığını görürük. Amma ABŞ və Rusiyanın dərin, fundamental maraqları iki dövlət arasında münasibətlərin normallaşmasını tələb edir. Rusiya və ABŞ bir çox sahədə əməkdaşlıq edə bilər. Düşünürük ki, regional münaqişələrin neytrallaşdırılmasında çox iş görə bilərik. Məsələn, kosmosda sülh və mülki məqsədlər naminə əməkdaşlığa davam edə bilərik".

Çıxışa davam edən Rusiya dövlət başçısı qarşı tərəfin marağını da nəzərə alaraq sözdən əmələ keçmək lazım olduğunu vurğulayıb: "Məncə bu əsas şərtdir. ABŞ-ın yeni seçilmiş prezidenti də müştərək əməkdaşlığa hazırdır. Real təcrübənin necə olacağını bilmirik. Trampın rəsmi olaraq vəzifəyə başlamasını və administrasiyasını qurmağını gözləməliyik".

Hikmət
Ölkə.Az