"Azəravtoyol" gücləndirilmiş iş rejiminə keçdi

Dekabrın 14 və 15-də gözlənilən hava şəraiti ilə əlaqədar olaraq "Azəravtoyol" balansında olan avtomobil yollarında hərəkətin fasiləsiz təşkili üçün gücləndirilmiş iş rejimində çalışacaq.

Bu barədə Ölkə.Az-a "Azəravtoyol" un mətbuat xidmətindən məlumat verilib.

Məlumatda bildirilir ki, yolların qardan və buzdan təmizlənməsi üçün bütün texnika, maşın-mexanizmlər hazır vəziyyətə gətirilib, kifayət qədər duz və qum ehtiyyatı toplanıb. Bakı şəhərində balansda olan yollarda, küçə və prospektlərdə, xüsusi ilə daha tez qar tutan və buzlaşan yollarda xidmət aparmaq üçün öncədən maşın-mexanizmlər əraziyə çıxarılacaq.

Anoloji addımlar respublikanın bütün avtomobil yollarında da atılacaq.

"Azəravtoyol" xəbərdarlıq edir ki, stılacaq qabaqlayıcı addımlara baxmayaraq, sürücülərin də bu cür hava şəraitinə hazır olması şərtdir. "Onlardan xahiş olunur ki, nasaz avtomobillərlə, xüsusi ilə yay şinlər ilə (4 mövsüm) təchiz olunmuş avtomobillərlə yollara çıxmasınlar. Çünki həmin avtomobillərin hərəkətində problemlərin olması qaçılmazdır. Üstəlik onlar digər avtonəqliyyat vasitələri üçün də maneə törədərək yollarda sıxlığın və tıxacın yaranmasına gətirib çıxaracaqlar. Belə olduqda isə yollarda yaranan sıxlıq və tıxac səbəbindən qar təmizləyən və duz-qum qarışığı səpən texnikaların da yollarda hərəkətində problemlər yaşanır. Nəticədə yolların vaxtında təmizlənərək hərəkətin fasiləsizliyini təmin etmək mümkün olmur".

"Azəravtoyol" təcrübəsiz sürücülərin də yollara çıxmamasını tövsiyyə edir.

Ölkə.Az