Üz dərisinin gözəlliyi üçün
Bu yazımız əsasən qadınlar üçün maraqlı olacaq. Üzünüzün dərisinin gözəl və təravətli olmasını istəyirsiniz?
Ölkə.Az-ın təqdim etdiyi siyahıda ərzaqlara diqqət edin və gündəlik qida rasionunda istifadə etməyə çalışın.
1. Qırmızı və narıncı rəngli tərəvəzlər
Qırmızı və narıncı rəngli tərəvəzlər dəri örtüyünü təzələyir. Bu siyahıya balqabaq, pomidor, yerkökü, ərik, bolqar bibərini aid etmək olar. Bu tərəvəz məhsullarının tərkibində karotin maddəsi olduğu üçün üz dərisi gözəl olur. Eyni zamanda karotin dəri hüceyrələrinin yenilənməsinə kömək edir.
2. Çərəz
Bu ərzaq məhsullarının tərkibində A, E vitaminləri, Q10 koenzimi var. Sadalanan vitaminlər bir çox kremlərin tərkibinə daxil edilir. Bundan başqa dərini günəş şüalanmasından, atmosferin təsirindən qoruyan antioksidantlar da çərəzin tərkibində var. Siyahıya əsasən balqabaq və günəbaxan tumları, qoz və badam daxil edilir. Nəzərə almaq lazımdır ki, bu qidalar kalorili olduğu üçün ifrat dərəcədə istifadə etmək məsləhət görülmür.
3. Giləmeyvə və meyvələr
Portağal, kivi, qreyfrut, çiyələk, qarağat, sitrus meyvələri, böyürtkən, moruq və qaragilənin tərkibində C vitamini var. Bu komponent dərini bərpa edən, qan-damar sistemini möhkəmləndirən, qocalma prosesini ləngidən antioksidant sayılır.
4. Yağlı balıq
Balıq saçları möhkəmləndirir, görmə qabiliyyətini yaxşılaşdırır, beyin üçün faydalıdır. Eyni zamanda, dəri üçün də vacibdir. Qızıl balıq, sardina, seld, makrel, tuna balığı, skumbriya və istiridyə dərini qırışlardan xilas edir. Bu dəniz məhsullarının tərkibində omeqa-3 yağları var. Bu yağ dərini nəmləndirir, qan dövranını yaxşılaşdırır, soyuqdəyməni aradan qaldırır. Dəniz məhsullarının tərkibində olan sink maddəsi dəri örtüyünün təzələnməsinə kömək edir.
5. Zeytun yağı
Məlum olduğu kimi quru dəri ən tez yaşlanmaya məruz qalan dəridir. Quru dəriyə qarşı ən yaxşı vasitə zeytun yağıdır. Digər yağlara nisbətən zeytun yağının tərkibində E və B vitaminləri, yağlı turşuların miqdarı 3 dəfə çoxdur.
6. Sıyıq və dənli bitkilər
Sıyıq və buğda çörəyi bağırsaqdan şlakları təmizləməyə, maddələr mübadiləsi və həzm prosesini yaxşılaşdırmağa kömək edir. Orqanizm şlaklardan təmizlənəndə dəri təravətini bərpa edir. Bundan başqa dənli bitkilərin tərkibində olan silisium maddəsi kollagen ifraz edir və bu da dərini möhkəmləndirir, yeniləndirir.
7. Kəsmik
Kəsmiyin əsas komponentləri selen və E vitaminidir. Bu güclü antioksidantlar qocalma prosesinin qarşısını alır. Eyni zamanda, kəsmiyin tərkibində olan kalsium diş və sümük üçün də vacib maddədir.
8. Avokado
Yetişmiş yumşaq avokado dərini əla qidalandırır. Avokadonun tərkibi dərini daxildən nəmləndirən efir yağları ilə zəngindir.
9. Yaşıl çay
Yaşıl çayın tərkibi dəri hüceyrələrin yaşlanmasının qarşısını alan və viruslara qarşı mübarizə aparan antioksidantlarla zəngindir. Yaşıl çay ürək fəaliyyəti üçün faydalıdır. Gün ərzində iki fincan yaşıl çay içmək erkən yaranan dəri qırışlarının qarşısını alır. Eyni zamanda, yaşıl çayı pambığa batırıb gözaltı torbalarını kompres etmək də mümkündür.
10. Təbii qatıq
Tərkibində laktobakteriyalar olan təbii kənd qatığı həzmi yaxşılaşdırır və dərini təmizləyir. Sutka ərzində 150 ml qatıq içmək dəri xəstəliklərinin qarşısını alır, üz və bədən dərisinin gözəlliyini qoruyur.
Hikmət
Ölkə.Az
