Razi Nurullayev: “Nazirlər kütləvi istefaya göndərilməlidir”
Xalqımız səbrli olmaqla yanaşı, həm də sadəlövhcəsinə ümid edib inanandır. Tezliklə yeni kadrların çox yüksək vəzifələrə gətiriləcəyinə və xalqı bir-iki gün ərzində İsveçrədəki kimi yaşadacağına hələ də inananlar var.
Ölkə.Az xəbər verir ki, bu sözləri Azərbaycan Xalq Cəbhəsi Partiyasının sədri Razi Nurullayev deyib. Sədr bildirib ki, siyasi sistemi bu qədər çətinlik və məşəqqətlə qurmayıblar ki, əzab-əziyyətə, beynəlxalq təşkilatların qınağına tuş gələ-gələ dirəniş göstərməyiblər ki, referendum keçirməyiblər ki, yaxşı oğlanları gətirib vəzifəyə qoyub, bu işi quranlara göstəriş verdirsinlər:
“Hazırkı siyasətdə bu mümkün deyil və buna inananların halına acıyıram. Deyirlər ki, Tarif Şurasının qərarı ləğv olunacaq. Nazirlər kütləvi istefaya göndəriləcək və s. İnanmaq çətindir. İlk öncə deyim ki, mən və partiyam da Prezidenti Tarif Şurasının qərarına yenidən baxmağa və xalqın mənafeyinə uyğun düzəlişləri etməyə çağırış edib. Eyni zamanda bir-birini təkrarlayan dövlət qurumlarının da ləğv edilməsini ehtiva edən təklifləri də Prezident Aparatına təqdim etmişik.
Yol Xəritəsi də illər öncə qəbul edilməli, həyata keçirilməli, icrası da korrupsiyaya bulaşmamış, yeni və savadlı kadrlara həvalə olunmalı idi. Bununla da bağlı təklifimizi hökumətə yazılı surətdə təqdim etmişik və mətbuatda da dərc edilib. Məsələ burasındadır ki, bu addımların indi atılması artıq çox çətindir. Onun üçün də Prezidentin ləğv qərarı verməsi həll variantı ola bilməz”.
Razi Nurullayev qeyd edib ki, hökumət sosial öhdəliklərini yerinə yetirmək üçün dotasiyalardan canını qurtarmalıdır:
“Azərişıq, Azərqaz, AzərİstilikTəchizat və digər bu kimi dövlət qurumları sərmayə qoymaq üçün büdcə pullarını sərf edirlər. Hökumət artıq bunu edə bilmir. Onlardan kəsib sosial öhdəliklərini yerinə yetirmək və bəzi əmək haqlarında artım etmək niyyətindədir. Onun üçün də tarif Şurasının qərarının ləğv edilməsi optimal variant deyildir. Ən yaxşısı, işıq və qaza qoyulan limitlərin artırılmasına nail olmaqdır.
Komandaya yeni kadrların cəlb edilməsi isə təbii ki, olacaq. Amma, açar vəzifələr yenə də köhnə qvardiyanın əlində qalacaq. Sadəcə olaraq, iş icraçılarından söhbət gedə bilər”.
