Ərdoğandan kritik açıqlama: "Türkiyədə səfərbərlik elan edirəm"

Türkiyə prezidenti Rəcəb Tayyip Ərdoğan səfərbərlik açıqlaması edib.

Ölkə.Az xəbər verir ki, terror təşkilatlarına qarşı milli səfərbərlik elan edən prezident təhlükəsizlik qüvvələrinə "Səlahiyyətlərinizi sonuna qədər istifadə edin" mesajını da verib.

Ərdoğan prezident sarayında keçirilən bölgə nümayəndələri ilə görüşdə terrorla mübarizə məsələsinə toxunub. "Artıq müdafiədə qala bilmərik" deyən prezident səfərbərlik elan edib və Türkiyənin təhlükə ilə üz-üzə olduğunu bildirib.

Prezident deyib: "İtkilərimiz olsa da, terror təşkilatlarını böyük tələfata uğratdıq. Təşkilat 9.500 üzvünü, o cümlədən bir neçə liderini itirib. Yaşadığımız dövr İstiqlal Savaşı qədər vacib və kritikdir. Bu gün Türkiyə və bölgə ətrafında hiyləgər oyunlar qurulub. Şəhidlərimizin qanı yerdə qalmayıb və qalmayacaq. Heç bir xəyanət cavabsız qalmayacaq. Bayrağımızı endirməyə çalışanların qolunu qırmasaq şəhidlərimizin ruhu bizi bağışlamaz. Vətənimizə göz dikənlərin gözünü tökmək bizim namus borcumuzdur. Bütün terror təşkilatlarına qarşı milli səfərbərlik elan edirəm. Hər terrorçunun 80 milyon düşməni var. Təhlükəsiz xidmətlərinə səslənirəm. Terror fəaliyyətinə qarşı dövlət də millət də sizinlə eyni cərgədədir. Səlahiyyətlərinizi sonuna qədər istifadə etməkdən çəkinməyin".

Hikmət
Ölkə.Az