Dünya liderlərinin ən yaxın dostu

Dünya liderlərini iclaslarda, görüşlərdə, rəsmi tədbirlərdə görməyə vərdiş etmişik. Amma unutmaq lazım deyil ki, bu lider siyasətçilərin də şəxsi həyatı, maraqları var.

Ölkə.Az bu gün dünyanın lider siyasətçilərinin heyvan sevgisini və saxladıqları itlərin fotolarını təqdim edir.

Vladimir Putinin köpəkləri

Şimal qonşumuz Vladimir Putindən başlayaq. Putinin heyvanlara qarşı sevgisi heç kəsə sirr deyil.

Bir neçə gün əvvəl Yaponiyaya səfər edən Putin bu dövlətin baş nazirinə və mətbuat nümayəndələrinə Yume adlı itini göstərmişdi.

2012-ci ildə Yaponiyanın Akita prefekturasında zəlzələdən sonra göstərdiyi köməyə görə Putinə küçük bağışladılar. Putinin digər iki köpəyini də dövlət başçıları hədiyyə edib.

2010-cu ildə Bolqariyanın baş naziri də Putinə qoyun iti bağışlamışdı. İtə Baffi adı verilmişdi.

2000-ci ildə Sergey Şoyqu Putinə Koni adlı labrador hədiyyə edib.

Barak Obamanın Sannisi

Obama ailəsi də ABŞ prezidentlərinin ənənəsinə sadiq qalaraq köpək bəsləyir. Ailə Ağ Evin həyətində Bo adlı it saxlayır. Bo bir neçə uşaq kitabı və oyuncağın qəhrəmanıdır.

2013-cü ilin avqust ayında Obama Sanni adlı başqa bir iti bəsləməyə başlayır.

ABŞ-ın 38-ci və 44-cü prezidentlərinin də ev heyvanı olub. Klintonlar ailəsində Baddi adlı Labrador, Buşun isə teryer cinsinə aid köpəyi olub.

Deyəsən yeni prezident Donald Tramp da Ağ Evə köçdükdən sonra pudel saxlayacaq.

Fransua Ollandın labradoru

Fransa prezidenti Fransua Olland 2014-cü ildən it saxlayır. Prezidentə Milad bayramı münasibətilə küçük bağışlamışdılar. Labrador cinsinə aid bu köpəyin adı Fildir. Prezident "Rozetta" kosmik missiyasının şərəfinə itini belə adlandırıb. "Fil" kosmik aparatı kometaya uğurlu eniş etmişdi.

Yelisey sarayında it saxlamaq ənənədir. Valeri Jiskar Desten, Fransua Miteran, Jorj Pompidu kimi prezidentlər də labrador saxlayıb. Jak Şirak malteze bəsləyib. Nikolay Sarkozinin saxladığı itlər isə dövlət əmlakına ziyan vurduqları üçün 6 min avro cərimə ödənilib.

İngiltərə kraliçasının köpəkləri

İngiltərə kraliçası 2-ci Yelizaveta dünyada ən çox it saxlayan dövlət başçısı kimi tanınır. Kraliçanın yeddi yaşı olanda ona ilk dəfə küçük hədiyyə edilir. 18 yaşı olanda da ona it hədiyyə edirlər.

Bu günə qədər kraliçanın 30 korqi köpəyi olub. Amma eyni anda saxladığı itlərin sayı 8-dir.

Təbii ki, sarayda itlərə qulluq edən xüsusi xidmətçi var. Amma Yelizaveta imkan tapdıqca itlərini özü yemləyir.

Berluskoninin sevimli Dudusu

İtaliyanın sabiq baş naziri Silvio Berluskoninin iti ölkədə heç də sahibindən az tanınmır. Dudu adlı ağ pudeli Berluskoninin həyat yoldaşı Françeska Paskal alıb.

Ağ pudel qısa müddət ərzində İtaliyanın "birinci köpəyi" kimi məşhurlaşdı. Hətta "Facebook" sosial şəbəkəsində Dudunun rəsmi səhifəsi də var.