Bakıda daha bir piyada keçidinin tikintisinə başlanılıb
Bakı şəhəri Yasamal rayonunun Hüseyn Cavid prospektində yeni piyada keçidinin inşasına başlanılıb.
“Azəravtoyol” ASC-nin Mətbuat Katibliyindən Ölkə.Az-a bildirilib ki, yeraltı olacaq piyada keçidi Hüseyn Cavid parkının qarşısında inşa edilir.
“Azəravtoyol”un “Azəryolelmitədqiqatlayihə” İnstitutu tərəfindən hazırlanan layihəyə əsasən, iki giriş-çıxışlı yeni piyada keçidinin ümumi uzunluğu 57,1 metr olacaq. Buraya keçidin 21,9 metr uzunluğunda olan pilləkan hissələri və 35,2 metr olan qalereyası daxildir. Qalereyanın (keçid hissə) eni 5 metr, hündürlüyü isə 3,2 metr olacaq. Keçid xidməti otaq və təhlükəsizlik kameraları ilə təchiz olunacaq.
"Piyada keçidi avtonəqliyyat vasitələrinin və piyadaların intensiv hərəkət etdiyi ərazidə inşa edilir. Məqsəd həm piyadaların rahat və təhlükəsiz şəraitdə avtomobil yollarının keçməsini təmin etmək, həm də avtonəqliyyat vasitələrinin fasiləsiz və maneəsiz hərəkətini təşkil etməkdir", - deyə şirkətdən bildirilib.
Qeyd edək ki, keçiddə fiziki qüsurli insanların hərəkəti üçün panduslar da quraşdırılacaq.
