ABŞ-ın nəqliyyat komandanı: “Dünya ictimaiyyətinə Azərbaycan kimi ölkələr lazımdır”
"Azərbaycan Əfqanıstanda sülhyaratma əməliyyatlarında müstəsna rol oynayır".
Ölkə.Az-ın APA-ya istinadən xəbərinə görə, bunu ABŞ-ın nəqliyyat komandanı Darren MakDyu (Darren McDew) Bakıda keçirdiyi brifinqdə deyib.
O bildirib ki, Azərbaycan sülhpərvər, təhlükəsiz və daim inkişaf edən ölkədir: “Bu, Azərbaycana ilk səfərimdir və fürsətdən istifadə edib azərbaycanlılara qonaqpərvərliklərinə görə təşəkkürümü bildirirəm.
Qeyd etmək istəyirəm ki, Azərbaycan prezidenti İlham Əliyev çox müstəsna bir liderdir. Biz cənab prezident və müdafiə naziri ilə görüşdə ABŞ və Azərbaycan arasında təhlükəsizliklə bağlı əməkdaşlığı və bu əməkdaşlığın gələcək perspektivlərini müzakirə etmişik. Azərbaycan strateji əhəmiyyəti olan bir ölkədir. Buna görə də Azərbaycanın sözügedən sahələrdə gördüyü işlər çox müsbət təəssürat yaradır. Əfqanıstana səfərim çərçivəsində bu ölkəndəki sülhməramlı əməliyyatların rəhbəri ilə görüşüm zamanı o mənə Azərbaycanın məhz sözügedən əməliyyatlarda müstəsna rol oynadığını qeyd edib.
O məndən xahiş etdi ki, Əfqanıstanda sülhyaratma əməliyyatlarına verdiyi töhfələrə görə Azərbaycan rəhbərliyinə minnətdarlıq edim. Düşünürəm ki, məhz Azərbaycanın bu rolu sayəsində həm regionda, həm də dünyanın müxtəlif dövlətlərində təhlükəsizlik və sabitlik qorunacaq”, - deyə D. MakDyu bildirib.
D. MakDyu qeyd edib ki, ABŞ və Azərbaycan təhlükəsizlik sahəsində çox faydalı əməkdaşlığa qoşulub: “Düşünürəm ki, Azərbaycan əsgərləri digər dövlətlərdən olan həmkarlarla birgə xidmət edərək onların təcrübələrindən bəhrələnmək imkanı əldə edib, yeni, müasir avadanlıqlarla tanış ola biliblər. Düşünürəm ki, bu əməkdaşlıq Azərbaycan üçün də faydalı olub. Azərbaycan kimi 25 ildir müstəqil olan ölkə ilə tərəfdaşlıq etmək həqiqətən də bizim üçün xoşdur".
