Tramp dünyanın ən varlı nazirlər kabinetini qurdu

Ölkə.Az xəbər verir ki, 4 milyarder və 10 multimilyonçudan təşkil edilən kabinetin ümumi sərvəti Trampın 4.5 milyardlıq vəsaiti ilə birlikdə 20 milyard dollara çatır. Tramp ABŞ-ı, sadəcə ölkə tarixinin yox, dünya tarixinin də ən varlı nazirlər kabineti ilə idarə edəcək.

 

Təxminən bir ay sonra ABŞ prezidenti vəzifəsinin icrasına başlayacaq Trampın iş yoldaşlarını əsasən seçki kampaniyasına dəstək milyarderlərdən seçdiyi iddia edilir. "Forbes"ə görə Tramp kabinetindəki ən varlı insan ticarət nazirinin müavini təyin edilən Todd Rikettsdir. Çikaqo "Kabs" (Cubs) beyzbol komandasının da sahiblərindən biri olan Riketts ailəsinin sərvəti 5.3 milyard dollardır.

Kabinetin 2-ci ən varlı üzvü isə Təhsil Nazirliyi vəzifəsi üçün adı hallanan Betsi DeVosdur. DeVosun sərvətinin isə 5.1 milyard dollar olduğu bildirilir.

 

Uilbur Ross isə Tramp kabinetinin 3-cü ən zəngin adamıdır. Sərvəti 2.9 milyard dollar olan Rossun adı ticarət naziri vəzifəsi üçün hallanır.

 

Trampın Kiçik Biznes idarəsinin rəhbərliyinə təyin etdiyi 4-cü və son milyarder isə Linda MakMahondur. MakMahonun sərvəti isə 1.16 milyard dollardır.

 

Dövlət Katibi vəzifəsi üçün adı hallanan "Exxon Mobile" şirkəti direktorlar şurasının sədri Reks Tillersonun sərvəti isə təxminən 300 milyon dollardır. O, kabinetin 5-ci ən varlı simasıdır.