Ekspert: "Dünya bankı ilə əlaqələrin genişlənəcəyini düşünürəm"

Bu gün Dünya Bankının (DB) vitse-prezidenti Lora Tak (Laura Tuck) Azərbaycana səfərə gəlir. Səfərdə bir neçə iqtisadçı ekspertlə görüşəcək vitse-prezident Azərbaycanla DB arasındakı əlaqələrin genişlənməsini müzakirə edəcək.

Vitse-prezidentlə görüşəcək ekspertlər sırasında iqtisadçı ekspert Vüqar Bayramov da var. Bu məsələ ilə bağlı ekspert Ölkə.az-a açıqlama verib:

"Azərbaycan üçün dünya bankı əməhiyyətli beynəlxalq qurumlardan biridir. Azərbaycanın dünya bankı ilə əməkdaşlığı artıq uzun zamandır ki, davam edir. Dünya bankının vitse prezidenti eyni zamanda sabah bir neçə ekspertlə, o cümlədən mənimlə də görüşü olacaq. Təbii ki, bu görüşdə Azərbaycanla dünya bankı arasında əlaqələrin mövcud vəziyyəti və bundan sonra inkişaf etdirilməsi müzakirə olunacaq və ekspertlərin fikirləri dinləniləcək. Dünya bankı üçün də Azərbaycan əhəmiyyətli ölkələrdən biridir. Nəzərə alaq ki, Azərbaycan ixrac potensialı artan ölkələrdəndir və ölkə iqtisadiyyatı Cənubi-Qafqaz iqtisadiyyatının 75%-ini təşkil edir.

Qeyd etmək istəyirəm ki, vitse prezidentin Azərbaycana gəlməsi və Azərbaycanda keçirilən görüşlərdən sonra dünya bankı ilə əlaqələrin genişlənməsi güman olunur.

Bu daha çox dünya bankının Azəbaycanda həyata keçirdiyi proqramların sayında artımların olacağında özünü daha çox göstərəcək. Dünya bankının proqramları Azərbaycan iqtisadiyyatının çox müxtəlif sektorlarını əhatə edəcək. Bu baxımdan belə bir səfərin olması olduqca sözü gedən qurumlar arasında münasibətlərin güclənməsinə, dünya bankının mövcud imkanlarəndan istifadə etməklə, xüsusən də qeyri-neft sektorunda daha çox proqramlar həyata keçirməyə imkan verəcək.

Azərbaycan bəzi ölkələrdə donor kimi çıxış edir...

Azərbaycan beynəlxaq təşkilatların kreditlərinə ciddi ehtiyyacı olmayan ölkədir. Azərbaycan artıq bəzi ölkələrdə donor kimi çıxış edir. Bu baxımdan Azərbaycan təkcə dünya bankı ilə maliyyə vəsaitlərinin əldə edilməsi ilə əlaqədar deyil, eyni zamanda dünya bankı ilə müxtəlif poqramların hazırlanmasında yaxından iştirak edəcək. Bu səfər Azərbaycanla dünya bankının münasibətlərinin dərinləşməsinə, və proqramların sayının artmasına səbəb olacaq.

- Vitse-prezidentlə görüşdə hansı təklif irəli sürəməyi düşünürsünüz?

"Ən çox müzakirə olunacaq məsələlər Azərbaycanın qeyri-neft sektorunun inkişafı ilə bağlı olacaq. Görüşdə Azərbaycanın ixrac imkanları ilə bağlı məlumat verməyi düşünürəm. Biz dünya bankı ilə Azərbaycan arasındakı əlaqələrin davmlılığına və genişlənməsində maraqlıyıq".

Qeyd edək ki, səfərin əsas məqsədi gələcək əməkdaşlıq istiqamətlərinin müzakirəsidir. Səfər çərçivəsində bir sıra görüşlərin keçirilməsi də nəzərdə tutulub.

Fatimə İbrahimova
Ölkə.az