Suiqəsd gecəsi Putinlə bağlı müdhiş təsadüf

Ankarada fəaliyyət göstərən Rusiya səfiri Andrey Karlovun qətlə yetirildiyi gecə Rusiyanın prezidenti Vladimir Putin də Moskvada bir teatr tamaşasını izləmək üçün yola çıxmışdı.

Ölkə.Az xəbər verir ki, prezidentin izləyəcəyi dram əsərinin müəllifi Aleksandr Qriboyedovdur. Aleksandr Qriboyedov 19-cu əsrin əvvəllərində Rusiyanın İrandakı səfiri kimi fəaliyyət göstərib.

1829-cu ildə diplomatik böhran çərçivəsində bir qrup qəzəbli iranlı səfirlik binasına hücum edərək səfir Qriboyedovu qətlə yetirmişdilər. Rus mənbələr qətlin arxasında ingilis xüsusi xidmət orqanlarının olduğunu iddia etmişdilər.

Bu təsadüf "Financial Times" mətbuat orqanının Moskva müxbiri Maks Seddonun diqqətini çəkib. Jurnalistin tvitini sosial şəbəkədə yüzlərlə istifadəçi paylaşıb. Paylaşım bəzi rusların sərt reaksiyasına səbəb olsa da, bəzi Twitter istifadəçiləri isə "Ankaradakı sui-qəsd Putinə və ya İrana mesajdırmı?" deyə şərh yazıblar.

Qeyd edək ki, Türkiyə, Rusiya və İranın xarici işlər nazirləri bu gün Moskvada görüşəcək. Üçtərəfli danışıqlarda Suriyadakı böhranın həlli yolları müzakirə ediləcək.