Yevlaxda ölü at və naməlum heyvan ətlərinin satışının qarşısı alınıb
Yevlax rayonunda 351 kiloqram ölü at və naməlum heyvan ətlərinin satışının qarşısı alınıb.
Ölkə.Az-ın "Report"a istinadən məlumatına görə, yararsız heyvan cəmdəkləri Aşağı Bucaq kənd sakinləri Nizami Kərimov və Telman Rəsulova məxsus antisanitar şəraitdə fəaliyyət göstərən, heyvan kəsim meydançasının soyuducu kamerasında və avtomobildə aşkarlanıb.
Rayon baytarlıq idarəsinin əməkdaşlarının keçirdiyi reyd zamanı cəmdəklərin qida üçün yararlığı şübhə doğurduğundan onlardan nümunələr götürülüb və müayinə üçün Respublika Baytarlıq Laboratoriyasına göndərilib. Yoxlamalar zamanı heyvan ətlərinin keyfiyyətsiz olması, öldükdən sonra kəsilməsi və baytarlıq-sanitariya cəhətdən tamam yararsız olması müəyyən edilib.
Bu gün Yevlax rayon Baytarlıq İdarəsinin soyuducu kamerasında saxlanan insan həyatı üçün təhlükəli olan cəmdəklər idarə əməkdaşları tərəfdən zərərsizləşdirlib.
N.Kərimov və T.Rəsulov isə müvafiq qaydada 220 və 280 manat cərimə ediliblər.
