\"Səsə dönsəydilər, ağzımı açan kimi dördü də dönərdilər\"

"O səs Türkiyə" Türkiyə yarışmasının daha bir azərbaycanlı iştirakçısı Pərvaz İbrahimli Ölkə.az - Azərbaycan və dünya xəbərləri" target="_blank">Ölkə.Az-ın suallarını cavablandırıb.

- Pərvaz, istərdim əvvəlcə "O səs Türkiyə" yarışmasına getmək ideyasından danışasan.

- Dostlarım, ətrafım, sənətimi izləyənlər bir neçə dəfə demişdilər ki, Azərbaycanda, xaricdə çox səhnələrdə olmusan, "O səs Türkiyə" yarışmasında da özünü sına. Oranın səhnəsi səninçün bir başqa olar, istedadını göstər. Ötən illərdə də bu barədə məsləhətlər verirdilər. İşlərimlə bağlı Türkiyəyə getmişdim, seçimlərin son günlərində əlim dinc durmadı, "Küçələrə su səpmişəm" mahnısını çəkib atdım "Acun Media"ya. İki gün sonra mənə zəng vurdular ki, başvurunuz uğurlu olub, sizi ön izləməyə çağırırq. Ön izləməyə getdim, "Deyme benim qamlı, yaslı gönlümə" mahnısını oxudum. Düşündüm ki, ilk cəhdimi Azərbaycan mahnısıyla eləmişəm, bunu da oxuyum, deməsinlər ki, başqa mahnı bilmir. Onsuz da ora gedən "Ayrılıq" kimi türklərin də tanıdığı mahnıları oxuyur. Dedilər ki, iki həftə ərzində sizə xəbər edəcəyik. İkinci həftədən sonra üçüncü tura çağırıldım. Bunlar efirsiz mərhələlər idi. Beş min nəfərin içərisindən seçilmişdik. Orada da altı mahnıyla məşq prosesləri başladı. Səhər saat 11-dən axşam saat 10-a qədər məşqlər gedirdi. Rəşid Behbudovun repertuarında Musiqisi Cahangir Cahangirova, sözləri İslam Səfərliyə aid olan "Aylı gecələr"i oxudum.

- Azərbaycanda muğam müsabiqəsindən, müxtəlif tədbirlərdən müəyyən qədər tanınırdın. Ən azından sənət aləmində özünü təsdiqləmişdin. Belə bir qorxun var idimi ki, gedərəm, seçilmərəm, biabır olaram?

- Qorxu yox, məsuliyyət var idi. Səhnədən heç vaxt qormamışam, həyəcanlanmamışam. İzləmişəm, lap təzə vaxtlarda elə səslərə dönüblər ki. Məndən əvvəl on beş nəfərə çəkiliş vaxtı dönməmişdilər. Həmin gecə əlli nəfər idik və cəmi on iki nəfərə döndülər. İçimdə gərginlik var idi ki, ifamı necə çatdırım. Orada səs göstərməklə deyil, bunlar fərqlilik istəyir. Əsas onu çatdırmaq lazımdır. Səhnəyə çıxanda məsuliyətlə yanaşı, hiss etdim ki, azacıq da həyəcan var. Yenə də özümü itirmədim. Ora soyuq yerdir deyə, səhnənin arxasında o tərəfə, bu tərəfə qaçırdım ki, isinim.

- Sənin ifana təkcə Sibel Can döndü...

- Əvvəldən də tək fikrim əsas onun dönməsiydi. Ritmsiz mahnı olduğundan hamının başa düşməsi mümkün deyil. Həm də ifamı istədiyim kimi çatdıra bilmədim. İfama da güvənirdim ki, onların hamısını döndərəcəyəm. Növbəti turlarda özümü göstərməyi qarşıma məqsəd qoymuşam.

- Hadisə səs və ifa olaraq orta səviyyəli sənətçidir. Onun Azərbaycanın yetərincə istedad sahibi olan gənc muğam ifaçısının səsinə dönməməsi qeyri-obyektivlik kimi görünmədi ki?

- Qeyri obyektivlik kimi görünmədi. Əgər səsə dönsəydilər, onların hamısı mən ağzımı açan kimi dönərdilər. Mahnını fərqli çatdırmağa üstünlük verirlər, baxış tərzimiz fərqlidir. Bu müsabiqədə uzun havadı, muğamdı qadağandır. Tarık hoca sadəcə, Mehmana bir neçə saniyəlik muğam oxumağa icazə vermişdi. Bir dəqiqə qırx saniyə vaxt verirlər.

- Bundan sonra fəaliyyətini Türkiyədə davam etdirəcəksən, yoxsa necə?

- Məqsədim odur ki, sənətlə məşğul olum, akademik səviyyədə ifa edim. Orada təkliflər olacaqsa, davam edəcəyəm. Eyni zamanda burada da müəyyən işlərim var. Bu ərəfədə tez-tez gedib gəldim.

İntiqam VALEHOĞLU
Ölkə.Az