İlin yekunu: dünyanın aqrar sektoru
Azər Qismət
2016-cı il dünyanın kənd təsərrüfatında maraqlı hadisələrlə yadda qaldı.
Ümumi planda yanaşdıqda, bir çox ölkə bu ili uğurlu hesab etdi. İlin yekunu barədə danışdıqda başlıca yerdə qiymətlər və dənli bitkilərin istehsalı yada düşür. Başlıca ərzaq məhsullarının qiymətində bir qayda olaraq artım olub. Ucuzlaşma əsasən az tələbat olan məhsullarda baş verib ki, bu da qısa müddət çəkib.
BMT-nin ərzaq proqramı - FAO-nun məlumatına əsasən bu il dənli bitkilərin istehsalında rekord göstərici qeydə alınıb. İl ərzində 2,57 milyard ton dənli bitki tədarük olunub ki, bu da proqnozdan 6 milyon ton çoxdur. Konkret olaraq, bu il zəmilərdən 749 milyon ton taxıl yığılıb ki, bu da 2015-ci ildəki göstəricidən 1,9% çoxdur. Bu artımda əsas rolu Rusiya, Qazaxıstan və İran oynayıb.
Qarğıdalı istehsalı da il ərzində 2,1% artaraq 1 milyard tonu keçib. Bu sahədə əsas artım ABŞ-ın hesabına əldə edilib. Düyü istehsalında da bu il tarixi rekord təzələnərək məhsuldarlıq 499 milyon tondan 600 milyon tona qalxıb. Məhsuldarlığın yüksəlməsinə Hindistan, Nepal və Malidəki yağışlı hava səbəb olub. FAO gələn il üçün əsasən müsbət proqnoz verməkdədir. Məsələn, taxılçılığa dair proqnozlara əsasən Rusiya və Ukraynada növbəti rekord gözlənilir.
Lakin şəkər istehsalı ilə bağlı müsbət statistika təqdim etmək mümkünn deyil. Bu il dünyada təxminən 168 milyon ton şəkər istehsal olunub ki, bu da tələbatdan 8 milyon ton azdır. Ötən il fərq 5 milyon ton idi. Tələbin təklifi üstələməsi nəticəsində yaydan etibarən dünyada şəkərin qiyməti 40% artıb.
